જામનગરમાં રેન્જ IG નિર્લિપ્ત રાયની વાર્ષિક નિરીક્ષણ મુલાકાત:SP કચેરી ખાતે ગાર્ડ ઓફ ઓનર સાથે સ્વાગત, ક્રાઈમ કોન્ફરન્સમાં કાયદો-વ્યવસ્થાની સમીક્ષા કરી

રાજકોટ રેન્જ IG નિર્લિપ્ત રાયે જામનગર જિલ્લાની વાર્ષિક નિરીક્ષણ મુલાકાત લીધી હતી. જામનગર આગમન સમયે પોલીસ વિભાગ દ્વારા તેમને ગાર્ડ ઓફ ઓનર આપવામાં આવ્યું હતું. આ પ્રસંગે જામનગર જિલ્લા પોલીસ વડા ડો. રવિ મોહન સૈની સહિતના ઉચ્ચ પોલીસ અધિકારીઓએ પુષ્પગુચ્છ અર્પણ કરી તેમનું સ્વાગત કર્યું હતું. SP કચેરી ખાતે ક્રાઈમ કોન્ફરન્સ યોજાઈ મુલાકાત દરમિયાન SP કચેરી ખાતે IG નિર્લિપ્ત રાયની અધ્યક્ષતામાં ક્રાઈમ કોન્ફરન્સ યોજાઈ હતી. જેમાં જિલ્લા પોલીસ વડા ડો. રવિ મોહન સૈની, DySP પિયુષ વાંદા, જયવીરસિંહ ઝાલા, વી.કે. પંડ્યા સહિતના પોલીસ અધિકારીઓ હાજર રહ્યા હતા. બેઠકમાં જિલ્લામાં કાયદો અને વ્યવસ્થાની સ્થિતિ તથા ગુનાખોરીને લગતા વિવિધ મુદ્દાઓની વિગતવાર સમીક્ષા કરવામાં આવી હતી. પોલીસ સ્ટેશનની કામગીરીનું નિરીક્ષણ કરી પોલીસ જવાનો સાથે સંવાદ કર્યો IG નિર્લિપ્ત રાયે ગ્રામ્ય પોલીસ મથકની રૂબરૂ મુલાકાત લઈ પોલીસ સ્ટેશનની કામગીરીનું નિરીક્ષણ કર્યું હતું. તેમણે પોલીસ સ્ટેશનના વિવિધ સરકારી રજિસ્ટરો અને દસ્તાવેજોની ચકાસણી કરી હતી. સાથે જ વણઉકેલાયેલા ગુનાઓ અને પડતર કેસોની સ્થિતિની પણ સમીક્ષા કરવામાં આવી હતી. નિરીક્ષણ દરમિયાન પોલીસ કર્મચારીઓની દૈનિક કામગીરી, ફરજ પ્રત્યેની જવાબદારી અને શિસ્ત અંગે પણ ઝીણવટભરી તપાસ કરવામાં આવી હતી. IGએ પોલીસ તંત્રની કામગીરી વધુ અસરકારક બને તે માટે જરૂરી માર્ગદર્શન આપ્યું હતું. કાર્યક્રમના અંતે IG નિર્લિપ્ત રાયે પોલીસ જવાનો સાથે સંવાદ સાધ્યો હતો. તેમણે પોલીસ કર્મચારીઓની કામગીરીને બિરદાવી હતી અને ભવિષ્યમાં પણ શિસ્ત, જવાબદારી અને પ્રજાસેવાના અભિગમ સાથે ફરજ બજાવવા પ્રોત્સાહિત કર્યા હતા. પડતર કેસોનો ઝડપી નિકાલ કરવા સૂચના આપી ક્રાઈમ કોન્ફરન્સ દરમિયાન IG રાયે અધિકારીઓને પડતર કેસોનો ઝડપી અને ન્યાયી નિકાલ લાવવા સૂચના આપી હતી. ગુનાની તપાસમાં ગુણવત્તા જળવાઈ રહે અને કોઈ નિર્દોષને અન્યાય ન થાય તે અંગે પણ ખાસ ધ્યાન આપવા જણાવ્યું હતું. IG નિર્લિપ્ત રાયે પ્રજાલક્ષી અને પારદર્શક પોલીસિંગને પ્રાથમિકતા આપવા અધિકારીઓને માર્ગદર્શન આપ્યું હતું. પોલીસની કામગીરીથી સામાન્ય નાગરિકોમાં સુરક્ષાની ભાવના મજબૂત થાય અને લોકોનો પોલીસ તંત્ર પ્રત્યે વિશ્વાસ વધે તે રીતે ફરજ બજાવવા પણ તેમણે જણાવ્યું હતું.