ચુડામાંથી ગેરકાયદેસર પિસ્ટલ સાથે એક શખ્સ ઝડપાયો:સુરેન્દ્રનગર SOGએ ચોર તળાવ પાસેથી આરોપીને પકડ્યો

સુરેન્દ્રનગર SOG શાખાએ ચુડાના કોરડા-સમઢીયાળા રોડ પરથી ગેરકાયદેસર પિસ્ટલ સાથે એક શખ્સને ઝડપી પાડ્યો છે. આ કાર્યવાહી ચોર તળાવ પાસેથી કરવામાં આવી હતી. રાજકોટ વિભાગના નાયબ પોલીસ મહાનિરીક્ષક નિર્લિપ્ત રાય અને સુરેન્દ્રનગર જિલ્લા પોલીસ અધિક્ષક પ્રેમસુખ ડેલુની સૂચના હેઠળ જિલ્લામાં કાયદો અને વ્યવસ્થા જાળવવા તેમજ હથિયારધારાના ગુનાઓ અટકાવવા માટે આ કામગીરી હાથ ધરવામાં આવી હતી. SOG શાખાના પોલીસ ઇન્સ્પેક્ટર બી.એચ. શિંગરખીયાના માર્ગદર્શન હેઠળ SOG કર્મચારીઓ ચુડા પોલીસ સ્ટેશન વિસ્તારમાં પેટ્રોલિંગ કરી રહ્યા હતા. તે દરમિયાન હેડ કોન્સ્ટેબલ કાનાભાઈ સાંબડ, પોલીસ કોન્સ્ટેબલ કુલદીપસિંહ ગોહિલ અને સુરેશભાઈ ખરગીયાને સંયુક્ત બાતમી મળી હતી. બાતમીના આધારે કોરડા-સમઢીયાળા રોડ પર આવેલા ચોર તળાવ પાસેથી કોરડા ગામના હરપાલસિંહ મનુભાઈ મસાણીને ઝડપી પાડવામાં આવ્યો હતો. તેની અંગઝડતીમાંથી ₹20,000ની કિંમતની ગેરકાયદેસર પિસ્ટલ મળી આવી હતી. પૂછપરછ દરમિયાન હરપાલસિંહે જણાવ્યું કે તેણે આ પિસ્ટલ મોજીદડ ગામના જયરાજસિંહ દીપાભાઈ મોરી પાસેથી મેળવી હતી. આ બંને આરોપીઓ વિરુદ્ધ ચુડા પોલીસ સ્ટેશનમાં આર્મ્સ એક્ટની કલમ 25(1)(a) અને 25(1-B)a હેઠળ ગુનો નોંધી વધુ કાર્યવાહી હાથ ધરવામાં આવી છે. આ કામગીરીમાં પી.આઈ. બી.એચ. શિંગરખીયા, પી.એસ.આઈ. ઝેડ.એલ. ઓડેદરા, હેડ કોન્સ્ટેબલ કાનાભાઈ સાંબડ, પોલીસ કોન્સ્ટેબલ કુલદીપસિંહ ગોહિલ, અનિરુદ્ધસિંહ ઝાલા, સુરેશભાઈ ખરગીયા, બિરેન્દ્રસિંહ પરમાર, વિજયસિંહ રથવી, ડ્રાઈવર હેડ કોન્સ્ટેબલ અશ્વિનભાઈ અને પોલીસ કોન્સ્ટેબલ નિતિનભાઈ ગોહિલ સહિતના સ્ટાફ જોડાયો હતો.