BSE શેર પર દબાણ, 3 મહિનામાં માર્કેટ કેપ ₹30,000 કરોડ ઘટ્યું, જાણો શું છે કારણ

Indiaના અગ્રણી સ્ટોક એક્સચેન્જ BSEના શેરે છેલ્લા બે વર્ષમાં રોકાણકારોને સારો રિટર્ન આપ્યો હતો. જોકે, હવે સ્થિતિ બદલાતી જોવા મળી રહી છે. છેલ્લા ત્રણ મહિનામાં BSEનું માર્કેટ કેપિટલાઇઝેશન લગભગ ₹.30,000 કરોડ ઘટ્યું છે. જેના કારણે રોકાણકારોની ચિંતા પણ વધી છે. નિષ્ણાતોના મતે BSEના બિઝનેસ પર હાલ ત્રણ મુખ્ય પડકાર છે. તેમાં નવું Closing Auction Session (CAS), ઇન્ડેક્સ ઓપ્શન્સમાં ઘટતું ટ્રેડિંગ અને બ્રોકર્સ માટે RBIના કડક બેંક ગેરંટી નિયમોનો સમાવેશ થાય છે. ઓપ્શન્સ ટ્રેડિંગમાં ઘટાડો BSEની આવકમાં ડેરિવેટિવ્સ અને ખાસ કરીને ઇન્ડેક્સ ઓપ્શન્સનો મોટો હિસ્સો છે. પરંતુ, ઓગસ્ટમાં અત્યાર સુધી BSEનું સરેરાશ દૈનિક ઓપ્શન્સ ટર્નઓવર જુલાઈની સરખામણીમાં લગભગ 12 ટકા ઘટ્યું છે. Nuvamaના રિપોર્ટ અનુસાર, BSEનું પ્રીમિયમ ટર્નઓવર 22.7 ટકા ઘટીને લગભગ ₹.18,100 કરોડ રહ્યું છે. બીજી તરફ, ઓપ્શન્સ કોન્ટ્રાક્ટ્સની સંખ્યામાં પણ લગભગ 30.5 ટકાનો ઘટાડો થયો છે. આ ઘટાડા પાછળનું એક મોટું કારણ CASને માનવામાં આવી રહ્યું છે. આ વ્યવસ્થામાં દિવસના અંતે શેર અથવા ઓપ્શનની ક્લોઝિંગ કિંમત ઓક્શન પ્રક્રિયા દ્વારા નક્કી થાય છે. તેના કારણે એક્સપાયરી સમયે ઓપ્શન્સની કિંમતમાં થનારા ફેરફારનો અંદાજ અગાઉની જેમ સરળ રહેતો નથી. BSEને વધારે અસર કેમ થઈ રહી છે? BSEના ડેરિવેટિવ્સ બિઝનેસમાં એક્સપાયરી ડેનું ખાસ મહત્વ છે. જુલાઈમાં BSEના લગભગ 72.6 ટકા કોન્ટ્રાક્ટ્સ એક્સપાયરી ડે દરમિયાન ટ્રેડ થયા હતા. એટલે એક્સપાયરીના દિવસે ટ્રેડિંગમાં ઘટાડો થાય તો તેની સીધી અસર BSEની આવક પર પડી શકે છે. BSEના શેરમાં અગાઉ આવેલી તેજી પાછળ Sensex ઓપ્શન્સમાં વધતી બજાર ભાગીદારી પણ મહત્વનું કારણ હતી. હવે જો આ વૃદ્ધિની ગતિ ધીમી પડે છે, તો BSEની ઊંચી વેલ્યુએશનને યોગ્ય ઠેરવવી મુશ્કેલ બની શકે છે. બ્રોકરેજ ફર્મોએ કમાણીના અંદાજ ઘટાડ્યા આ બદલાયેલી સ્થિતિને ધ્યાનમાં રાખીને કેટલીક બ્રોકરેજ કંપનીઓએ BSEની કમાણીના અનુમાનમાં ઘટાડો કર્યો છે. Jefferiesએ FY27થી FY29 માટેના EPS અંદાજમાં 5થી 12 ટકા સુધીનો ઘટાડો કર્યો છે. Nuvamaએ પણ FY27 અને FY28 માટેના EPS અંદાજમાં અનુક્રમે 6.3 ટકા અને 15 ટકાનો ઘટાડો કર્યો છે. આ ઉપરાંત RBIના નવા બેંક ગેરંટી નિયમો બ્રોકર્સના બિઝનેસ તેમજ હાઈ-ફ્રીક્વન્સી ટ્રેડિંગ પર અસર કરી શકે છે. Jefferiesના અનુમાન પ્રમાણે આગામી એક વર્ષમાં તેના કારણે પ્રીમિયમ ટર્નઓવર 10 ટકા સુધી ઘટી શકે છે. શું BSEના શેરમાં ફરી તેજી આવી શકે? BSE માટે સમગ્ર સ્થિતિ નકારાત્મક નથી. એક્સચેન્જ ઓપ્શન ફીમાં વધારો કરીને પોતાની આવક વધારી શકે છે. સાથે જ માર્કેટમાં વોલેટિલિટી વધે, ટ્રેડર્સ CAS સાથે વધુ સારી રીતે અનુકૂળ થાય અને ઓક્શન દરમિયાન લિક્વિડિટી વધે તો ટ્રેડિંગ ફરી મજબૂત બની શકે છે. જોકે, Jefferiesએ BSEના શેરને Underperform રેટિંગ આપ્યું છે અને તેનો ટાર્ગેટ પ્રાઇસ ₹.3,520થી ઘટાડીને ₹.2,940 કર્યો છે. Nuvamaએ ટાર્ગેટમાં કર્યો મોટો ઘટાડો Nuvamaએ BSEને Hold રેટિંગ આપતાં ટાર્ગેટ ₹.4,090થી ઘટાડીને રુ.3,240 કર્યો છે. આથી BSEમાં રોકાણ અંગે નિર્ણય લેતી વખતે માત્ર ભૂતકાળના શાનદાર રિટર્નને ધ્યાનમાં લેવું યોગ્ય નહીં હોય. રોકાણકારોએ ઓપ્શન્સ ટ્રેડિંગ, CASની અસર અને આગામી ત્રિમાસિક ગાળામાં કંપનીની કમાણીના આંકડાઓ પર ખાસ નજર રાખવી પડશે. Disclaimer :આ માહિતી માત્ર જાણકારીના હેતુથી આપવામાં આવી છે. તેને કોઈપણ પ્રકારની રોકાણ સલાહ માનવી નહીં. શેરબજારમાં રોકાણ કરતા પહેલાં તમારા નાણાકીય સલાહકારની સલાહ લેવી જરૂરી છે. વધુ સમાચાર વાંચવા ડાઉનલોડ કરો સંદેશ ન્યૂઝ એપ