વાપીમાં મોબાઈલ સ્નેચિંગ કરતી ગેંગ ઝડપાઈ:ડુંગરા પોલીસે 19 વર્ષના આરોપીને 6 મોબાઈલ સાથે પકડ્યો, એક ફરાર

વલસાડ જિલ્લામાં ચોરીના ગુના આચરતા ગુનેગારો પર પોલીસ વડા યુવરાજસિંહ જાડેજાની સૂચનાથી ખાસ અભિયાન ચલાવવામાં આવ્યું હતું. આ અંતર્ગત ડુંગરા પોલીસને મોટી સફળતા મળી છે. પોલીસે વાપીના ડુંગરા પોલીસ સ્ટેશન વિસ્તારમાં બનેલી મોબાઈલ સ્નેચિંગની ઘટનાઓનો ભેદ ઉકેલી એક આરોપીને પકડ્યો છે, જ્યારે તેનો અન્ય એક સાથીદાર ફરાર છે. ડુંગરા પોલીસ સ્ટેશનના પોલીસ ઇન્સ્પેક્ટર બી.એન. ગોહીલ અને પીએસઆઈ કે.આર. ચોટલીયાના માર્ગદર્શન હેઠળ સ્નેચિંગના વણઉકેલ્યા ગુનાઓ શોધવા માટે અલગ-અલગ ટીમો બનાવી હતી. પોલીસે ઘટના સ્થળના સીસીટીવી ફૂટેજ તપાસ્યા અને ટેકનિકલ એનાલિસિસની મદદ લીધી. આ દરમિયાન કોન્સ્ટેબલ કિશનભાઈ હરજીભાઈને મળેલી ખાનગી બાતમીના આધારે પોલીસે દરોડો પાડી આરોપી જુનૈદને પકડ્યો હતો. પકડાયેલા આરોપીનું નામ જુનૈદ મોહીબ કરમશેર ખાન છે, જેની ઉંમર 19 વર્ષ છે. તે હાલ વાપીના છીરી, ગાલામસાલામાં સુન્ની મસ્જિદ સામે ફ્લેટ નંબર 405 માં રહે છે. તેનું મૂળ સરનામું ઉત્તર પ્રદેશના ગોંડા જિલ્લાના ધાનેપુર તાલુકાના બોધિકપુરવા ગામનું છે. આ કેસમાં સંડોવાયેલો અન્ય એક સહ-આરોપી મુન્ના રામધની યાદવ (રહે. છીરી, ક્રિષ્ણાપાર્ક, વિજય સાંઈ ભક્તિ-2, વાપી) પોલીસને મળ્યો ન હતો. જેથી પોલીસે તેને ફરાર જાહેર કરી તેની શોધખોળ શરૂ કરી છે. પોલીસે આરોપી જુનૈદ પાસેથી અલગ-અલગ કંપનીના કુલ 6 એન્ડ્રોઈડ મોબાઈલ ફોન જપ્ત કર્યા છે. આ મોબાઈલ ફોનની કુલ કિંમત 42,000 રૂપિયા છે.