સુરેન્દ્રનગરના ખેરાળી રોડ પર બે બાઇક વચ્ચે અકસ્માત:18 વર્ષના યુવાનનું સારવાર દરમિયાન મોત થયું, એકને ગંભીર ઈજા; પોલીસે તપાસ શરૂ કરી

સુરેન્દ્રનગરના ખેરાળી નજીક બે બાઈક વચ્ચે અકસ્માત થયો હતો. આ ઘટનામાં 18 વર્ષના એક યુવાનનું સારવાર દરમિયાન મોત થયું છે, જ્યારે અન્ય એક વ્યક્તિને ગંભીર ઈજા પહોંચી છે. આ અકસ્માત સુરેન્દ્રનગર શહેરમાં બહુમાળી ભવનથી ખેરાળી તરફ જતા રોડ પર થયો હતો. બે મોટરસાઈકલ સામસામે ધડાકાભેર અથડાઈ હતી. ટક્કર એટલી જોરદાર હતી કે બંને બાઈક ચાલકો રોડ પર પટકાયા હતા અને તેમને ગંભીર ઈજાઓ થઈ હતી. અકસ્માત થતા જ આસપાસના લોકો મદદ માટે દોડી આવ્યા હતા. તેમણે તરત જ 108 એમ્બ્યુલન્સને જાણ કરી હતી. 108ની ટીમે ઘટનાસ્થળે પહોંચીને બંને ઈજાગ્રસ્તોને તાત્કાલિક હોસ્પિટલ પહોંચાડ્યા હતા. હોસ્પિટલમાં સારવાર દરમિયાન 18 વર્ષીય બાઈક ચાલક અજયભાઈ કોઠારીયાનું મોત થયું હતું. તેમને ગંભીર ઈજાઓ થઈ હતી. અન્ય એક ઈજાગ્રસ્તની હાલત હજુ પણ ગંભીર છે અને તેની સારવાર ચાલી રહી છે. યુવાનના મોતના સમાચાર મળતા પરિવારમાં શોક છવાઈ ગયો હતો. આ ઘટનાની જાણ થતા જ જોરાવરનગર પોલીસનો સ્ટાફ ઘટનાસ્થળે અને હોસ્પિટલ પહોંચ્યો હતો. પોલીસે અકસ્માતે મોતનો ગુનો નોંધી મૃતદેહને પોસ્ટમોર્ટમ માટે મોકલી આપ્યો છે. પોલીસે આ સમગ્ર બનાવ અંગે વધુ તપાસ શરૂ કરી છે.