નવસારી ST ડેપોએ રક્ષાબંધને 50 વધારાની બસ દોડાવી:અમદાવાદ, વડોદરા, સુરત સહિતના રૂટ પર મુસાફરોનો ધસારો

નવસારી ST ડેપો મેનેજમેન્ટે રક્ષાબંધનના તહેવાર દરમિયાન મુસાફરોની સુવિધા માટે મહત્વપૂર્ણ વ્યવસ્થા કરી છે. GSRTC સંચાલિત આ ડેપો દ્વારા નિયમિત બસો ઉપરાંત 50 વધારાની બસ ટ્રીપ દોડાવવામાં આવી હતી. આ પગલું તહેવાર નિમિત્તે વધેલા ભારે ટ્રાફિક અને મુસાફરોના ધસારાને પહોંચી વળવા માટે લેવામાં આવ્યું હતું. દક્ષિણ ગુજરાતમાંથી મધ્ય ગુજરાત, સુરત અને આસપાસના જિલ્લાઓમાં અવરજવર કરતા પ્રવાસીઓ માટે ST બસ પરિવહનનું મુખ્ય માધ્યમ છે. મુસાફરોની વિશેષ માંગને ધ્યાનમાં રાખીને, નવસારી ડેપોએ અમદાવાદ, વડોદરા, સુરત, વલસાડ, તાપી, ધરમપુર અને ડાંગ સહિતના વિસ્તારો માટે વધારાની બસોની સુવિધા પૂરી પાડી હતી. ST તંત્ર દ્વારા તહેવારના પર્વે મુસાફરોને અગવડ ન પડે તે માટે અગાઉથી જ આયોજન કરવામાં આવ્યું હતું. આ અંતર્ગત, ગઈકાલે 21 વધારાની ટ્રીપ દોડાવવામાં આવી હતી. આજે મુસાફરોના ધસારાને જોતા વધુ ટ્રીપો ઉમેરીને કુલ 50 જેટલી વધારાની બસોનું સંચાલન કરવામાં આવ્યું હતું. રક્ષાબંધન પર્વની ઉજવણી માટે દક્ષિણ ગુજરાત સહિત સમગ્ર રાજ્યમાં મહિલાઓ મોટા પાયે મુસાફરી કરતી હોય છે. નિયમિત બસો હાઉસફુલ થઈ જતી હોવાથી, આ 50 વધારાની ટ્રીપથી મુસાફરોને સમયસર અને સુરક્ષિત રીતે પોતાના ગંતવ્ય સ્થાન સુધી પહોંચવામાં મોટી રાહત મળી હતી.