શ્રાવણી પૂનમે 100થી વધુ બ્રાહ્મણોએ યજ્ઞોપવિત ધારણ કર્યું:રાજપીપળાની ચોર્યાસીની વાડી ખાતે વૈદિક પરંપરા મુજબ વિધિ યોજાઈ

રાજપીપળામાં શ્રાવણી પૂનમના પવિત્ર દિવસે ૧૦૦થી વધુ બ્રાહ્મણોએ યજ્ઞોપવિત ધારણ કરવાની વિધિ કરી હતી. આ વર્ષે રક્ષાબંધનના પૂર્વ દિવસે ચોર્યાસીની વાડી ખાતે વૈદિક પરંપરા મુજબ આ ધાર્મિક કાર્યક્રમનું આયોજન કરવામાં આવ્યું હતું. બ્રાહ્મણ સમાજ માટે શ્રાવણી પૂનમનું ધાર્મિક અને આધ્યાત્મિક મહત્વ છે. વર્ષોથી ચાલી આવતી પરંપરા મુજબ, આ દિવસે બ્રાહ્મણો દ્વારા યજ્ઞોપવિત પરિવર્તન અને ધારણ કરવાની વિધિ કરવામાં આવે છે. ચોર્યાસીની વાડી ખાતે વહેલી સવારથી જ બ્રાહ્મણ સમાજના લોકો એકઠા થયા હતા. ધાર્મિક વાતાવરણ વચ્ચે વૈદિક મંત્રોચ્ચાર અને પૂજનવિધિ સાથે પરંપરાગત રીતે યજ્ઞોપવિત ધારણ કરવાની વિધિ સંપન્ન થઈ હતી. બ્રાહ્મણોએ જૂના યજ્ઞોપવિતનું પરિવર્તન કરી વિધિપૂર્વક નવું યજ્ઞોપવિત ધારણ કર્યું હતું.