શંખેશ્વર મહેસૂલી કર્મચારીઓ કાળી પટ્ટી બાંધી હડતાળ પર:પડતર માંગણીઓ માટે સેવાસદન ખાતે વિરોધ પ્રદર્શન કર્યું

શંખેશ્વરના મહેસૂલી કર્મચારીઓએ પોતાની પડતર માંગણીઓના નિરાકરણ માટે વિરોધ પ્રદર્શન કર્યું છે. ગુજરાત રાજ્ય મહેસૂલી કર્મચારી મહામંડળના સમર્થનમાં, શંખેશ્વર તાલુકા સેવાસદન કચેરીના કર્મચારીઓ કાળી પટ્ટી ધારણ કરીને હડતાળમાં જોડાયા હતા. કર્મચારીઓએ જૂના અને વિવિધ પડતર પ્રશ્નોના નિરાકરણની માંગ સાથે આ વિરોધ નોંધાવ્યો છે. તેમની મુખ્ય માંગણીઓ અંગે સરકારે સત્વરે નિર્ણય લે તેવી તેઓ અપેક્ષા રાખી રહ્યા છે. મહેસૂલી કર્મચારીઓએ ચેતવણી આપી છે કે જો તેમની માંગણીઓ સ્વીકારવામાં નહીં આવે તો આગામી દિવસોમાં તેઓ માસ સીએલ (સામૂહિક રજા) પર ઉતરશે. આ ઉપરાંત, આવતા સોમવારે કાળી પટ્ટી ધારણ કરી પેન ડાઉન કાર્યક્રમ કરવામાં આવશે. જો સરકાર દ્વારા કોઈ સકારાત્મક પ્રતિસાદ નહીં મળે તો અનિશ્ચિત મુદત સુધી હડતાળ ઉપર ઉતરવાની ચીમકી પણ ઉચ્ચારવામાં આવી છે.