સગીરા સાથે દુષ્કર્મ આચરનાર આરોપીને 20 વર્ષની કેદ:પરિણીત આરોપીએ સગીરાને અલગ અલગ જગ્યાએ ફેરવીને દુષ્કર્મ આચર્યું હતું

અમદાવાદના વટવા પોલીસ મથકે BNS અને પોક્સો એક્ટની કલમ અંતર્ગત 27 વર્ષીય આરોપી કમલેશ ભુરીયા સામે ગુનો નોંધાયો હતો. જેનો કેસ અમદાવાદ સિટી સેશન્સ કોર્ટ ખાતે આવેલી પોક્સોની વિશેષ અદાલતમાં ચાલી જતા જજ એ.બી.ભટ્ટે, સરકારી વકીલ કે.જી.જૈનની દલીલો 14 સાહેદ અને 21 દસ્તાવેજી પુરાવા તપાસીને આરોપીને 20 વર્ષ સખત કેદની સજા ફટકારી છે. અજાણ્યા શખ્સ વિરુદ્ધ અપહરણની ફરિયાદ કેસને વિગતે જોતા 2 જૂન, 2024 ના રોજ ફરિયાદી અને તેમની પત્ની મજૂરી કામે ગયા હતા. તેમની 17 વર્ષની સગીર દીકરી વટવા ગામ કડીયાનાકા પાસેથી ગુમ થઈ ગઈ હતી. અમદાવાદ અને વતનમાં શોધખોળ કર્યા બાદ ભાળ ન મળતાં, પિતાએ 7 જૂન, 2024 ના રોજ વટવા પોલીસ સ્ટેશનમાં અજાણ્યા શખ્સ વિરુદ્ધ અપહરણની ફરિયાદ નોંધાવી હતી. સગીરા પર અવાર-નવાર દુષ્કર્મ આચર્યું ભોગ બનનાર અને આરોપી મળી આવતાં તપાસમાં જાણવા મળ્યું કે, આરોપી ભોગ બનનારને લગ્ન કરવાની અને ફરવાની લાલચ આપીને બારેજા, બાવળા તથા પોતાની ફોઈના ઘરે દાહોદ લઈ ગયો હતો. ત્યાં તેણે સગીરાની મરજી વિરુદ્ધ અવારનવાર શારીરિક સંબંધ બાંધી દુષ્કર્મ આચર્યું હતું. સગીરાને 4 લાખ રૂપિયા વળતર ચૂકવવા આદેશ કોર્ટે નોંધ્યું હતું કે ભોગ બનનાર સગીર વયની હોવાથી કાયદા મુજબ તેની સંમતિ કાયદેસર ગણાતી નથી. વળી, આરોપી પરિણિત હોવાથી તે લગ્ન કરી શકે તેમ ન હતો, છતાં તેણે સગીરાને ફોસલાવીને અપહરણ કર્યું હતું. ભોગ બનનારની જુબાની, ડૉક્ટર સમક્ષ આપેલી મેડિકલ હિસ્ટ્રી અને Crpc ની કલમ 164 મુજબનું મેજિસ્ટ્રેટ સમક્ષનું નિવેદન એકસમાન અને સુસંગત માલૂમ પડ્યા હતા. કોર્ટે સગીરાને 4 લાખ રૂપિયા વળતર ચૂકવવા પણ આદેશ કર્યો છે.