સાગબારામાં 24 દિવસના ધરણાના પારણા બાદ જમીન વિવાદ યથાવત:મંત્રીના વચન છતાં વન વિભાગે નાલ ગામે ખેડૂતોને અટકાવ્યા; ખેડૂતોએ કહ્યું- સનદ મળે ત્યાં સુધીમાં તો સિઝન જતી રહેશે

નર્મદાના સાગબારામાં 24 દિવસથી ચાલેલા જંગલ જમીનના ધરણા મંત્રીઓની ખાતરી બાદ સમેટાયા હતા. આમ છતાં નાલ ગામે જમીન ખેડવા બાબતે ખેડૂતો અને વન વિભાગ વચ્ચે સ્થાનિક સ્તરે ફરી ઘર્ષણ સર્જાયું હતું. વનમંત્રીએ 90 દિવસમાં પેન્ડિંગ અરજીઓ પર સનદ આપવાનું વચન આપ્યું હોવા છતાં ખેતી કરતા રોકવામાં આવતા આદિવાસી ખેડૂતોમાં રોષ વ્યાપ્યો છે. ધરણાના અંત બાદ વિવાદ યથાવત નર્મદા જિલ્લાના સાગબારા ખાતે છેલ્લા 24 દિવસથી ચાલી રહેલા જંગલ જમીનના ધરણાનો મંત્રીઓની હાજરીમાં અંત લાવવામાં આવ્યો હતો. જો કે, ધરણા સમાપ્ત થયા પછી પણ જંગલ જમીન ખેડવા અંગેનો વિવાદ સમવાનું નામ લેતો નથી. વન વિભાગ સાથે ખેડૂતોની ઘર્ષણ નાલ ગામના ખેડૂતો પોતાની જમીન ખેડવા ગયા ત્યારે વન વિભાગના કર્મચારીઓ સાથે ફરીથી વિવાદ થયો હતો. ખેડૂતોનો આક્ષેપ છે કે વનમંત્રી પ્રવીણ માળીએ 90 દિવસમાં પેન્ડિંગ દાવા અને અરજીઓ પર સનદ આપવાની ખાતરી આપી હતી. ચાલુ સિઝને ખેતી કરવા માંગ મંત્રીઓની ખાતરી છતાં હાલ ખેડૂતોને જમીન ખેડવા જતાં વન વિભાગ દ્વારા અટકાવવામાં આવી રહ્યા છે. ખેડૂતોની માંગ છે કે 90 દિવસ પછી સનદ મળવાની હોય તો આ સિઝનમાં ખેતી કરવા દેવી જોઈએ, નહિતર આખું વર્ષ રોજીરોટીનો પ્રશ્ન ઊભો થશે. સરકારના વચન સામે ઉઠ્યા સવાલો ધરણા સ્થળે વનમંત્રી સહિતના મંત્રીઓએ વચન આપીને આંદોલનકારી ખેડૂતોના પારણા કરાવ્યા હતા. નાલ ગામના ખેડૂતો સાથે થયેલા ઝઘડા બાદ મંત્રીઓના વચનો માત્ર આંદોલન સમેટવા પૂરતા હતા કે કેમ તેવા પ્રશ્નો ચર્ચાઈ રહ્યા છે. પેન્ડિંગ દાવાઓ મંજૂર કરવાની આશા આંદોલન પૂરું થતી વખતે સાંસદ મનસુખ વસાવાએ રાજ્યના 60000થી 70000 પેન્ડિંગ દાવા મંજૂર કરવાની વાત કરી હતી. હવે સરકારના વચન મુજબ યોગ્ય કાર્યવાહી થાય અને ખેડૂતોને તેમના સાચા હક મળે તેના પર સૌની નજર ટકેલી છે.