રાજપથ રંગોલી ક્લબ રોડ પર અર્બન ચોક ફૂડ બજારમાં આગ:ફાયરબ્રિગેડની ત્રણથી ચાર ગાડી ઉપર રવાના, ખાણીપીણીના ત્રણથી ચાર સ્ટોલ આગની ચપેટમાં

અમદાવાદના રાજપથ રંગોલી ક્લબ રોડ પર આવેલા અર્બન ચોક ફૂડ બજારમાં આગ લાગવાની ઘટના બની છે. ફાયરબ્રિગેડની ત્રણથી ચાર ગાડી ઘટનાસ્થળ ઉપર રવાના કરવામાં આવી છે. ખાણીપીણીના ત્રણથી ચાર સ્ટોલમાં આગ લાગી હોવાનું પ્રાથમિક રીતે જાણવા મળ્યું છે. ફાયર બ્રિગેડ હાલ સ્થળ પર પહોંચી અને આગને કાબુમાં લેવાના પ્રયત્ન કરી રહી છે. બોપલ ફાયરની ત્રણ ગાડીઓ ઘટનાસ્થળે ફાયર બ્રિગેડ સૂત્રો પાસેથી મળતી માહિતી મુજબ અમદાવાદ શહેરમાં ખાણીપીણી માટે સૌથી પ્રખ્યાત રાજપથ રંગોલી ક્લબ રોડ ઉપર આવેલા અર્બન ચોક ફૂડ બજારમાં આજે રાત્રે 8 વાગ્યાની આસપાસ ચાટના ફૂડ સ્ટોલમાં આગ લાગવાની ઘટના બની હતી. થોડા સમયમાં આખા આઉટલેટમાં લાગી ગઈ હતી અને બાજુના મોમોસના આઉટલેટ સુધી પહોંચી ગઈ હતી આગ વિકરાળ સ્વરૂપ ધારણ કરી લીધું હતું. જેના પગલે ફાયર બ્રિગેડની ટીમને જાણ કરવામાં આવી હતી. બોપલ ફાયર સ્ટેશનની ત્રણ જેટલી ગાડીઓ અને ડિવિઝનલ ફાયર ઓફિસર સ્વસ્તિક જાડેજા તાત્કાલિક સ્થળ ઉપર પહોંચ્યા છે. કરવાચોથનું વ્રત હોવાથી મોટી સંખ્યામાં લોકો પહોંચ્યા હતા ફાયર બ્રિગેડની ટીમ દ્વારા પાણીનો મારો ચલાવી આગને બુજાવવાનો પ્રયત્ન કરવામાં આવ્યો છે. ચાટ અને મોમોસ સહિત કુલ ત્રણ આઉટલેટમાં આગ લાગી છે. અર્બન ચોક ફૂડ બજારમાં લગભગ 50થી વધારે ફૂડ સ્ટોલ આવેલા છે આજે કરવા ચોથનું વ્રત હોવાના કારણે મોટી સંખ્યામાં લોકોની ભીડ હતી. આગના કારણે અફરાતફરીનો માહોલ સર્જાયો હતો આગ લાગવાના કારણે અર્બન ચોક ફૂડ બજારમાં નાસભાગ મચી ગઈ હતી. તાત્કાલિક ધોરણે ફૂડ બજારમાંથી લોકોને બહાર કાઢવા પડ્યા હતા. ફાયર વિભાગની ટીમે તમામ લોકોને બહાર સહી સલામત કાઢ્યા હતા. આ ઘટનામાં અત્યારે કોઈ જાનહાનિ થઈ ન હોવાનું જાણવા મળ્યું છે.