રાહુલ ગાંધી વિરુદ્ધ નોંધાયેલી FIRનો પાટણમાં વિરોધ:કોંગ્રેસે સિદ્ધપુર ચોકડી પર સુત્રોચ્ચાર સાથે ચક્કાજામ કર્યો, કાર્યકરોની અટકાયત

ઉત્તરાખંડની ભાજપ સરકાર દ્વારા લોકસભાના વિપક્ષી નેતા રાહુલ ગાંધી વિરુદ્ધ નોંધાયેલી FIRના વિરોધમાં પાટણ જિલ્લા કોંગ્રેસ સમિતિ દ્વારા ઉગ્ર વિરોધ પ્રદર્શન કરાયું હતું. જિલ્લા કોંગ્રેસ કાર્યાલયથી નીકળેલી રેલી સિદ્ધપુર ચોકડી ખાતે પહોંચી હતી, જ્યાં કાર્યકરોએ સૂત્રોચ્ચાર સાથે ચક્કાજામ કર્યો હતો. પોલીસે સ્થળ પરથી અનેક કાર્યકરોની અટકાયત કરી હતી. આ વિરોધ પ્રદર્શનમાં જિલ્લા કોંગ્રેસના તમામ તાલુકા અને શહેર પ્રમુખો, ચૂંટાયેલા સદસ્યો, વિવિધ સેલ તથા ફ્રન્ટલ ઓર્ગેનાઈઝેશનના ચેરમેનો, હોદ્દેદારો, આગેવાનો અને મોટી સંખ્યામાં કાર્યકરો ઉપસ્થિત રહ્યા હતા. વિરોધ પ્રદર્શનની શરૂઆત પાટણ સ્થિત જિલ્લા કોંગ્રેસ કાર્યાલયથી થઈ હતી. કાર્યકરો અને આગેવાનોએ ભાજપ સરકાર વિરુદ્ધ ભારે સૂત્રોચ્ચાર સાથે રેલી સ્વરૂપે પ્રયાણ કર્યું હતું. આ રેલી શહેરના વિવિધ માર્ગો પરથી પસાર થઈને સિદ્ધપુર ચોકડી ખાતે પહોંચી હતી. સિદ્ધપુર ચોકડી પર મોટી સંખ્યામાં ભેગા થયેલા કોંગ્રી કાર્યકરોએ રસ્તો રોકી ચક્કાજામ કર્યો હતો. ચક્કાજામના કારણે વાહનવ્યવહાર ખોરવાતાં સ્થિતિને કાબૂમાં લેવા માટે તૈનાત પોલીસે કાર્યવાહી હાથ ધરી હતી અને ચક્કાજામ કરી રહેલા કોંગ્રેસના કાર્યકરો તથા આગેવાનોની સ્થળ પરથી અટકાયત કરી હતી.