ગોધરામાં અજાણ્યા મૃતદેહને કચરાના ટ્રેક્ટરમાં લઈ જવાયો:નર્મદા કેનાલમાંથી મળેલા મૃતદેહને શ્મશાને લઈ જવામાં પાલિકાની બેદરકારી

ગોધરા નગરપાલિકાની બેદરકારી સામે આવી છે. રતનપુર કાંટડી ગામ પાસે નર્મદા કેનાલમાંથી એક અજાણ્યા પુરુષનો મૃતદેહ મળ્યો હતો. આ મૃતદેહને અંતિમ સંસ્કાર માટે લઈ જવા પાલિકાના કર્મચારીઓએ શવવાહિનીને બદલે કચરો ઉપાડવાના ટ્રેક્ટરનો ઉપયોગ કર્યો હતો. ગત 2 સપ્ટેમ્બરના રોજ ગોધરા તાલુકાના રતનપુર કાંટડી ગામ પાસેથી પસાર થતી નર્મદાની મુખ્ય કેનાલમાંથી આ મૃતદેહ મળ્યો હતો. મૃતક પુરુષની ઉંમર આશરે 45 વર્ષ હોવાનું અનુમાન છે અને તે અર્ધનાગ્ન હાલતમાં હતો. મૃતદેહના વાલીવારસ ન મળતા કાંકણપુર પોલીસે કાયદેસરની કાર્યવાહી કરી હતી. મૃતદેહને ઓળખ માટે ગોધરા સિવિલ હોસ્પિટલના કોલ્ડ રૂમમાં રાખવામાં આવ્યો હતો. ગોધરા નગરપાલિકાના ઈનચાર્જ ચીફ સેનેટરી ઈન્સ્પેક્ટર રેહલ માલવીએ જણાવ્યું હતું કે, અજાણી વ્યક્તિની દફનવિધિ માટે નગરપાલિકા પાસે શવવાહિની સહિતની તમામ સુવિધા છે. તેમ છતાં મૃતદેહને કચરાના ટ્રેક્ટરમાં લઈ જવાનો મામલો સામે આવ્યો છે. આ મામલે જે કોઈ કર્મચારી સંકળાયેલા હશે તેમની સામે કાયદેસરની કાર્યવાહી કરવામાં આવશે. નિયમ પ્રમાણે, જ્યારે મૃતદેહની ઓળખ ન થાય ત્યારે સરકારી તંત્ર દ્વારા સન્માનપૂર્વક અંતિમ સંસ્કાર કરવાના હોય છે. જોકે, ગોધરા નગરપાલિકાના સફાઈ કર્મચારીઓએ આ મૃતદેહને પોસ્ટમોર્ટમ રૂમથી શ્મશાન ગૃહ સુધી કચરાના ટ્રેક્ટરમાં લઈ જઈને નિયમોનો ભંગ કર્યો હતો. અજાણ્યા મૃતદેહોની સેવા કરતા ગોધરાના સામાજિક કાર્યકર અતુલભાઈ ઠક્કરે આ ઘટનાને અમાનવીય ગણાવી હતી. તેમણે પાલિકા તંત્ર સામે નારાજગી વ્યક્ત કરી હતી. આ મામલો સામે આવતા ગોધરા નગરપાલિકાના ઈનચાર્જ ચીફ સેનેટરી ઈન્સ્પેક્ટરે તેની નોંધ લીધી છે. તેમણે કસૂરવાર કર્મચારીઓ સામે કાયદેસરના પગલાં ભરવાની ખાતરી આપી છે.