NALSAR Students Face Advocate Enrolment Freeze: NALSAR ସ୍ନାତକଙ୍କୁ ଓକିଲ ଭାବେ ପଞ୍ଜୀକରଣ ମନା, CJI ନିମନ୍ତ୍ରଣ ବିବାଦରେ ବାର କାଉନସିଲର ବଡ଼ ନିଷ୍ପତ୍ତି

ଭାରତୀୟ ବାର କାଉନସିଲ (BCI) ନିର୍ଦ୍ଦେଶ ଦେଇଛି ଯେ, ୨୦୨୬ରେ ନ୍ୟାସନାଲ ଏକାଡେମୀ ଅଫ୍ ଲିଗାଲ ଷ୍ଟଡିଜ୍ ଆଣ୍ଡ ରିସର୍ଚ୍ଚ (NALSAR), ହାଇଦ୍ରାବାଦରୁ ଆଇନ ଡିଗ୍ରୀ ହାସଲ କରିଥିବା କୌଣସି ଛାତ୍ରଙ୍କୁ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ କୌଣସି ରାଜ୍ୟ ବାର କାଉନସିଲ ଆଇନଜୀବୀ ଭାବେ ପଞ୍ଜୀକରଣ କରିପାରିବେ ନାହିଁ। BCI ଏକ ଆଦେଶରେ କହିଛି, “ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ NALSAR ୟୁନିଭର୍ସିଟି ଅଫ୍ ଲ’ର ୨୦୨୬ରେ ଆଇନ ଡିଗ୍ରୀ ହାସଲ କରିଥିବା କୌଣସି ଛାତ୍ରଙ୍କୁ କୌଣସି ରାଜ୍ୟ ବାର କାଉନସିଲ ଆଇନଜୀବୀ ଭାବେ ପଞ୍ଜୀକରଣ କରିବେ ନାହିଁ।” ୟୁନିଭର୍ସିଟିର ସମାବର୍ତ୍ତନ ଉତ୍ସବରେ ମୁଖ୍ୟ ଅତିଥି ଭାବେ ଭାରତର ପ୍ରଧାନ ବିଚାରପତି (CJI) ଜଷ୍ଟିସ ସୂର୍ଯ୍ୟକାନ୍ତଙ୍କୁ ନିମନ୍ତ୍ରଣ କରାଯିବାକୁ ନେଇ କିଛି NALSAR ଛାତ୍ର ବିରୋଧ କରିଥିବା ଖବର ପରେ ଏହି ନିଷ୍ପତ୍ତି ଆସିଛି। ଏହି ଘଟଣା ପରେ ଚଳିତ ବର୍ଷ ଏହି ପ୍ରତିଷ୍ଠିତ ଆଇନ ଅନୁଷ୍ଠାନରୁ ସ୍ନାତକ ହେଉଥିବା ଛାତ୍ରମାନଙ୍କ ବୃତ୍ତିଗତ ଭବିଷ୍ୟତକୁ ନେଇ ଚିନ୍ତା ବଢ଼ିଛି। ବିଶେଷକରି ଆଇନଜୀବୀ ଭାବେ ପଞ୍ଜୀକରଣ ଏବଂ ପରବର୍ତ୍ତୀ ସମୟରେ ଆଇନ ବୃତ୍ତିରେ ପ୍ରବେଶ ପ୍ରଭାବିତ ହେବାର ଆଶଙ୍କା ଦେଖାଦେଇଛି। NALSAR କୁଳପତିଙ୍କଠାରୁ ରିପୋର୍ଟ ମାଗିଲା BCI ସମାବର୍ତ୍ତନ ଉତ୍ସବକୁ ନେଇ ସୃଷ୍ଟି ହୋଇଥିବା ଘଟଣାକ୍ରମ ସମ୍ପର୍କରେ BCI, NALSARର କୁଳପତିଙ୍କଠାରୁ ମଧ୍ୟ ରିପୋର୍ଟ ମାଗିଛି। BCI କାର୍ଯ୍ୟକାରୀ କମିଟିର ସଦସ୍ୟ ଆଡଭୋକେଟ୍ ଭି.ପି. ଶର୍ମା କହିଛନ୍ତି ଯେ, କମିଟିର ଅନୁମୋଦନ ପରେ ଏହି ନିଷ୍ପତ୍ତି ନିଆଯାଇଛି। ଛାତ୍ରମାନଙ୍କ ମଧ୍ୟରେ ଶୃଙ୍ଖଳା ସୁନିଶ୍ଚିତ କରିବା ପାଇଁ ଏହି ପଦକ୍ଷେପ ଆବଶ୍ୟକ ଥିଲା ବୋଲି ସେ କହିଛନ୍ତି।