લૂંટ અને વાહન ચોરીના ગુનામાં સંડોવાયેલા બે રીઢા ગુનેગારો ઝડપાયા:રામોલમાં થયેલી લૂંટ, કાગડાપીઠમાં બે વાહનની ચોરીનો ભેદ ઉકેલાયો

લૂંટ અને વાહન ચોરીના અનેક ગુનાઓમાં સંડોવાયેલા બે રીઢા ગુનેગારોની પોલીસે ધરપકડ કરી છે. પોલીસે મુખ્ય આરોપી આકિબખાન ઉર્ફે 'ભૂરા' પઠાણ અને તેના સાગરિત મોહસીન ઉર્ફે 'મિટ્ટી' પઠાણને ઝડપી પાડીને તાજેતરમાં રામોલમાં થયેલી લૂંટ અને કાગડાપીઠમાં થયેલી બે વાહન ચોરીના ગુનાઓનો ભેદ ઉકેલી નાખ્યો છે. દારૂ, જુગાર, લૂંટ સહિત અનેક ગુનામાં સંડોવાયેલો પોલીસ તપાસમાં સામે આવ્યું છે કે, મુખ્ય આરોપી આકિબખાન વિરુદ્ધ અગાઉ પેટલાદ, ગાયકવાડ હવેલી, નડિયાદ ટાઉન, નારોલ, રામોલ અને ઇસનપુર સહિતના વિવિધ પોલીસ મથકોમાં દારૂ, જુગાર, લૂંટ અને વાહન ચોરી જેવા 23 જેટલા ગંભીર ગુનાઓ નોંધાઈ ચૂક્યા છે. આ સિવાય, કાગડાપીઠ પોલીસની કડક પૂછપરછ દરમિયાન આકિબખાને કબૂલાત કરી હતી કે, તેણે ચાલુ વર્ષે જ રામોલ વિસ્તારમાં લૂંટની ઘટનાને અંજામ આપ્યો હતો અને છેલ્લા કેટલાક મહિનાઓથી તે પોલીસ ચોપડે ફરાર હતો. અન્ય કોઈ ગુનામાં સંડોવણી છે કે કેમ તે અંગે તપાસ શરૂ કાગડાપીઠ પોલીસે રામોલ પોલીસને આરોપીનો કબજો સોંપવાની કાયદેસરની તજવીજ હાથ ધરી છે. બીજી તરફ, તેના સાગરિત મોહસીન ઉર્ફે મિટ્ટી પઠાણનો પણ ગુનાહિત ઇતિહાસ રહ્યો છે. તેની વિરુદ્ધ અગાઉ દાણીલીમડા પોલીસ સ્ટેશનમાં ત્રણ ગુના નોંધાયેલા હોવાનું બહાર આવ્યું છે. આ બંને શાતિર ચોરો બાઇક અને ઓટો રિક્ષાની ચોરી તેમજ લૂંટની પ્રવૃત્તિઓમાં સક્રિય હતા. કાગડાપીઠ પોલીસે બંનેની ધરપકડ કરીને તેમની પાસેથી ચોરીનો મુદ્દામાલ રિકવર કરવાની સાથે અન્ય કોઈ ગુનામાં તેમની સંડોવણી છે કે કેમ તે અંગે વધુ તપાસ હાથ ધરી છે.