અમદાવાદ રેપના આરોપીને પગમાં ગોળી વાગી:પંચનામા દરમિયાન ભાગવાનો પ્રયાસ કરતા પોલીસ પર હુમલો કર્યો હતો, એક પોલીસ કર્મીને ઈજા

અમદાવાદના જોધપુરની એક સોસાયટીમાં ભાડાના ફલેટમાં રહેતી યુવતી સાથે સોસાયટીના જ સિક્યુરિટી ગાર્ડે ગળે વાયર બાંધી દુષ્કર્મ આચર્યું હતું. યુવતી વોકિંગ કરવા ધાબે પહોંચતા સંબંધ બાંધવા માગ કરી હતી, ઇન્કાર કર્યો તો મોઢું દબાવી હેવાનિયત આચરી હતી. પંચનામા માટે પોલીસ જ્યારે આરોપીને લઈ ગઈ ત્યારે આરોપીને ગોળી વાગી હતી. હેબતપુર વિસ્તારમાં પંચનામા દરમ્યાન આરોપી ધર્મસિંહે ભાગવાની કોશિષ કરી પોલીસ પર હુમલો કર્યો હતો. જેને પગલે પોલીસે સ્વબચાવમાં ફાયરિંગ કરતા આરોપીને પગમાં ગોળી વાગી હતી. આ દરમિયાન એક પોલીસકર્મી પણ ઈજાગ્રસ્ત થયો છે. સિક્યુરિટી ગાર્ડ લિફ્ટમાં ધાબા પર આવતો અને દુષ્કર્મ આચર્યા બાદ જતો હોય તે CCTVમાં કેદ થયું હતું. યુવતી ઈન્ટિરિયર ડિઝાઈનિંગનો અભ્યાસ કરે છે. 8 ઓગસ્ટે દુષ્કર્મ કર્યા બાદ 9 ઓગસ્ટની વહેલી સવારે આરોપી ધર્મસિંહ રામશંકરસિંહની હેબતપુર પાસેથી ધરપકડ કરવામાં આવી હતી.