આંદરણામાં મોરબી કલેક્ટરે રાત્રીસભા યોજી ગ્રામજનોના પ્રશ્નો સાંભળ્યા:સ્થળ પર જ નિરાકરણ માટે અધિકારીઓને સૂચના આપી, યોજનાઓની માહિતી પણ અપાઈ

મોરબી તાલુકાના આંદરણા ગામમાં જિલ્લા કલેક્ટર સ્વપ્નિલ ખરેની અધ્યક્ષતામાં રાત્રીસભા યોજાઈ હતી. આ સભામાં ગ્રામજનોએ ગામની અલગ અલગ સ્થાનિક સમસ્યાઓ, પ્રશ્નો અને રજૂઆતો કલેક્ટર સામે રજૂ કરી હતી. કલેક્ટર સ્વપ્નિલ ખરેએ ગ્રામજનોના પ્રશ્નો ધ્યાનથી સાંભળ્યા હતા. તેમણે સંબંધિત વિભાગના અધિકારીઓને જરૂરી કાર્યવાહી કરવા સૂચનાઓ આપી. કેટલાક પ્રશ્નોનું તો સ્થળ પર જ નિરાકરણ પણ લાવવામાં આવ્યું હતું. આ ઉપરાંત, ગ્રામજનોને અલગ અલગ સરકારી યોજનાઓ અને વિકાસના કામો વિશે માહિતી પણ આપવામાં આવી હતી. આ રાત્રીસભામાં જિલ્લા ગ્રામ વિકાસ એજન્સીના નિયામક નવલદાન ગઢવી, પ્રાંત અધિકારી પ્રવીણસિંહ જેતાવત અને મુખ્ય જિલ્લા આરોગ્ય અધિકારી ડો. પવનકુમાર શ્રીવાસ્તવ હાજર રહ્યા હતા. તેમની સાથે પીજીવીસીએલ, જિલ્લા પંચાયત, શિક્ષણ, સમાજ કલ્યાણ, સમાજ સુરક્ષા, આઈસીડીએસ, પશુપાલન, ખેતી, બાગાયત, પાણી પુરવઠા તેમજ માર્ગ અને મકાન વિભાગના અધિકારીઓ પણ ઉપસ્થિત હતા. આ સિવાય મોરબી તાલુકાના અલગ અલગ વિભાગોના અધિકારીઓ અને મોટી સંખ્યામાં ગ્રામજનો પણ રાત્રીસભામાં હાજર રહ્યા હતા.