પાટણ નગરપાલિકાને 7.30 કરોડની ગ્રાન્ટ ફાળવાઈ:શહેરના સર્વાંગી વિકાસને વેગ મળશે

ગાંધીનગરના મહાત્મા મંદિર ખાતે મુખ્યમંત્રીની અધ્યક્ષતામાં યોજાયેલા ચેક વિતરણ સમારોહમાં પાટણ નગરપાલિકાને 7.30 કરોડ રૂપિયાની ગ્રાન્ટ ફાળવવામાં આવી છે. આ રકમ શહેરના સર્વાંગી વિકાસ કામો માટે ઉપયોગમાં લેવાશે. આ સમારોહ રાજ્યની મહાનગરપાલિકાઓ અને નગરપાલિકાઓના સર્વાંગી વિકાસ માટે યોજાયો હતો. જેમાં કુલ 3850 કરોડ રૂપિયાના ચેક અર્પણ કરવામાં આવ્યા હતા. મુખ્યમંત્રી ભૂપેન્દ્ર પટેલે નગરપાલિકાઓ માટે 858 કરોડ રૂપિયાના ચેકનું વિતરણ કર્યું હતું. આ પ્રસંગે નાણાં અને શહેરી વિકાસ મંત્રી કનુભાઈ દેસાઈ, કૃષિ મંત્રી જીતુભાઈ વાઘાણી, શહેરી વિકાસ રાજ્યમંત્રી દર્શનાબેન વાઘેલા સહિતના મહાનુભાવો ઉપસ્થિત રહ્યા હતા. પાટણ નગરપાલિકા વતી પ્રમુખ ચંદ્રિકાબેન રાવળ, ઉપપ્રમુખ ઉત્કર્ષ પટેલ, કારોબારી ચેરમેન નીલેશ પટેલ અને કોર્પોરેટર રોહિત પટેલે ગ્રાન્ટનો ચેક સ્વીકાર્યો હતો. ફાળવાયેલી આ રકમનો ઉપયોગ પાટણ શહેરના વિવિધ વિકાસકીય કામો અને માળખાકીય સુવિધાઓ વધારવા માટે કરાશે.