લાલાવદર ખાતે 12 કરોડના ખર્ચે 66 કે.વી. સબસ્ટેશનનું ખાતમુહૂર્ત:ઊર્જામંત્રી કૌશિક વેકરીયાના હસ્તે કરાયું, 6 ગામના 2,500 ગ્રાહકોને મળશે વીજળી

અમરેલી તાલુકાના લાલાવદર ગામમાં ગુજરાત એનર્જી ટ્રાન્સમિશન કંપની લિમિટેડ-GETCO દ્વારા 12 કરોડ રૂપિયાથી વધુના ખર્ચે 66 કે.વી. સબસ્ટેશન બનશે. ઊર્જા રાજ્યમંત્રી કૌશિક વેકરીયાના હસ્તે તેનું ખાતમુહૂર્ત કરવામાં આવ્યું હતું. આ સબસ્ટેશન શરૂ થતાં અમરેલી શહેર અને ગ્રામ્ય ખેતીવાડી વિસ્તાર ઉપરાંત લાલાવદર, સલડી, ગોઢાવદર, દુધાળા (બાઈ) અને કેરિયા-નાગસ સહિતના છ ગામોના આશરે 2,500 ગ્રાહકોને સારો અને સતત વીજપુરવઠો મળશે. નવા સબસ્ટેશનના કારણે લો-વોલ્ટેજ સહિતની વીજળી સંબંધિત સમસ્યાઓ પણ ઓછી થશે. આ પ્રસંગે લાલાવદર-ચક્કરગઢ સી.સી રોડના બાકી રહેતા ભાગમાં આશરે 80 લાખ રૂપિયાના ખર્ચે બનનાર સુવિધા પથનું પણ ખાતમુહૂર્ત કરવામાં આવ્યું હતું. મંત્રીએ ભૂમિપૂજન કર્યું અને નવા સ્ટેશનની તકતીનું અનાવરણ કર્યું. લાલાવદરમાં રાજ્ય અને રાષ્ટ્રીય કક્ષાની રમત-ગમત સ્પર્ધાઓ યોજી શકાય તેવું આધુનિક રમત-ગમત સંકુલ તૈયાર કરવામાં આવ્યું છે. આ સંકુલમાં યોજાનારી મોટી સ્પર્ધાઓથી લાલાવદરનું નામ રાજ્ય અને રાષ્ટ્રીય સ્તરે જાણીતું થશે. ખેલાડીઓ માટે રહેવા અને જમવાની સુવિધા આપવા રાજ્ય સરકાર દ્વારા 100 ભાઈઓ અને 100 બહેનો માટેની 25 કરોડ રૂપિયાના ખર્ચે હોસ્ટેલ મંજૂર કરવામાં આવી છે. મંત્રી કૌશિક વેકરીયાએ જણાવ્યું કે, અમરેલી-લાલાવદર-લીલીયા માર્ગ અગાઉ ખરાબ હાલતમાં હતો, જેથી અકસ્માતો થતા હતા. સ્થાનિકોની રજૂઆતને ધ્યાનમાં રાખીને આ માર્ગને આધુનિક બનાવવામાં આવ્યો છે. નવી શાળા, પંચાયત ભવન, આરોગ્ય કેન્દ્ર, આંગણવાડી, માર્ગ-રસ્તા, રમત-ગમત સંકુલ અને સબસ્ટેશન સહિતના વિવિધ વિકાસકાર્યો દ્વારા છેલ્લા સાડા ત્રણ વર્ષમાં લાલાવદરને રાજ્ય સરકાર તરફથી આશરે 100 કરોડ રૂપિયાના વિકાસકાર્યોની ભેટ મળી છે.