વઘઈમાં દુકાનમાંથી સિગારેટ-રોકડ ચોરી કરનાર 3 આરોપી પકડાયા:અંકલેશ્વરથી ઝડપાયા, પોલીસે 1.35 લાખનો મુદ્દામાલ રિકવર કર્યો

ડાંગ જિલ્લાના વઘઈમાં એક કરિયાણાની દુકાનમાંથી સિગારેટ અને રોકડ રકમની ચોરી થઈ હતી. આ મામલે વઘઈ પોલીસે ત્રણ આરોપીઓને અંકલેશ્વરથી પકડી પાડ્યા છે. પોલીસે આરોપીઓ પાસેથી કુલ 1.35 લાખ રૂપિયાનો ચોરીનો સામાન પાછો મેળવી લીધો છે. આ સાથે જ ઘરફોડ ચોરીનો એક અનડિટેક્ટ ગુનો પણ ઉકેલાઈ ગયો છે. પોલીસ પાસેથી મળેલી માહિતી મુજબ, આ ઘટના 16 સપ્ટેમ્બર 2026ના રોજ રાત્રે બની હતી. વઘઈ વિસ્તારમાં આવેલી કરિયાણાની દુકાનના ધાબા પરના દરવાજાનું તાળું તોડી અજાણ્યા લોકો અંદર ઘૂસ્યા હતા. તેઓએ દુકાનમાં રાખેલા અલગ-અલગ બ્રાન્ડના સિગારેટના પેકેટ, જેની કિંમત 1,27,675 રૂપિયા હતી, અને ગલ્લામાં રાખેલા 1,700 રૂપિયા રોકડા ચોરી લીધા હતા. ચોરી કર્યા બાદ આરોપીઓ ત્યાંથી ભાગી ગયા હતા. આ મામલે વઘઈ પોલીસ સ્ટેશનમાં ઘરફોડ ચોરીનો ગુનો નોંધવામાં આવ્યો હતો. આ ગુનો ગંભીર હોવાથી સુરત વિભાગના પોલીસ મહાનિરીક્ષક પ્રેમવીરસિંઘ અને ડાંગ જિલ્લા પોલીસ અધિક્ષક પૂજા યાદવે મિલકત સંબંધિત ગુનાઓ ઉકેલવા સૂચના આપી હતી. નાયબ પોલીસ અધિક્ષક કે.આર. ડીમરીના માર્ગદર્શન હેઠળ વઘઈ પોલીસ સ્ટેશનના પોલીસ ઇન્સ્પેક્ટર એ.એ. ચાવડાએ અલગ-અલગ ટીમો બનાવી તપાસ શરૂ કરી. પોલીસ ટીમે ઘટનાસ્થળ અને આસપાસના વિસ્તારોના CCTV કેમેરા ચેક કર્યા. ટેક્નિકલ સર્વેલન્સ અને હ્યુમન સોર્સની મદદથી આરોપીઓની ઓળખ થઈ. આરોપીઓ અંકલેશ્વરમાં હોવાની જાણ થતાં પોલીસ ટીમ ત્યાં પહોંચી અને ત્રણેય આરોપીઓને ચોરીના સામાન સાથે પકડી પાડ્યા. પોલીસ તપાસમાં સામે આવ્યું કે આરોપી મોહમ્મદ આદિલખાન પઠાણ પહેલા ફરિયાદીની દુકાનમાં લગભગ એક અઠવાડિયા સુધી નોકરી કરી ચૂક્યો હતો. આ કારણે તેને દુકાન અને આસપાસના વિસ્તારની સારી જાણકારી હતી. આરોપીઓ અંકલેશ્વરથી બસ દ્વારા રાત્રે વઘઈ આવ્યા હતા. તેઓએ દુકાનની છત પરના દરવાજાનું તાળું તોડી અંદર પ્રવેશ કર્યો અને ચોરી કરી. ચોરી કર્યા બાદ તેઓ ફરી બસ દ્વારા પાછા ફર્યા હતા. પોલીસે આરોપીઓ પાસેથી 65 હજાર રૂપિયા રોકડા, 13,700 રૂપિયાની સિગારેટ અને 57 હજાર રૂપિયાના ત્રણ સ્માર્ટ મોબાઇલ ફોન જપ્ત કર્યા છે. આમ, કુલ 1.35 લાખ રૂપિયાનો સામાન કબજે કરવામાં આવ્યો છે. પકડાયેલા આરોપીઓમાં મોહમ્મદ આદિલખાન ઉસ્માનખાન પઠાણ, અમનભાઈ અબ્બાસભાઈ સૈયદ અને ખાનજાદા મોહમ્મદ સમીર અબ્દુલ મજીદનો સમાવેશ થાય છે.