UPI MDR ચાર્જ હવે શેરબજાર સુધી પહોંચ્યો, કોણ ચૂકવશે? NSE CEOએ કરી સ્પષ્ટતા

UPI પર નવો MDR ચાર્જ 15 ઓક્ટોબરથી લાગુ થવા જઈ રહ્યો છે. હવે આ ચાર્જ માત્ર વેપારીઓ પૂરતો સીમિત નહીં રહેતા શેરબજાર સુધી પણ પહોંચ્યો છે. તાજેતરમાં NSEના CEOએ આ અંગે વાત કરતાં સ્પષ્ટ કર્યું છે કે આ ચાર્જ કોણ ચૂકવશે. UPI પર MDR ચાર્જ લાગુ થવા જઈ રહ્યો છે અને હવે તેની અસર માત્ર વેપારીઓ સુધી નહીં, પરંતુ શેરબજાર સુધી પણ પહોંચી છે. આ અંગે એવા અહેવાલો સામે આવ્યા હતા કે NSE અને સરકાર વચ્ચે આ મુદ્દે વાતચીત ચાલી રહી છે. જોકે, નેશનલ સ્ટોક એક્સચેન્જ (NSE)ના MD અને CEO આશિષ કુમાર ચૌહાણે આ અંગે સ્પષ્ટતા કરી છે. તેમણે ‘ઇકોનોમિક ટાઇમ્સ’ સાથેની વાતચીતમાં જણાવ્યું કે UPIના નવા મર્ચન્ટ ડિસ્કાઉન્ટ રેટ (MDR)ને લઈને NSEની સરકાર સાથે કોઈ વાતચીત થઈ નથી. તેમણે સ્પષ્ટ કર્યું કે આ મામલો સંપૂર્ણપણે સ્ટોક બ્રોકર અને તેમના ગ્રાહકો વચ્ચેનો છે. નવા ચાર્જની અસર કેવી રીતે સંભાળવી તે બંનેએ મળીને નક્કી કરવું પડશે. 15 ઓક્ટોબરથી લાગુ થશે MDR 15 ઓક્ટોબર 2026થી શેરબજાર અને અન્ય મૂડીબજાર સાથે જોડાયેલા UPI પેમેન્ટ પર 0.02% MDR લાગુ થશે. તેમાં શેર, સિક્યોરિટીઝ, મ્યુચ્યુઅલ ફંડ અને સ્ટોક બ્રોકર સાથે જોડાયેલા પેમેન્ટનો સમાવેશ થાય છે. જોકે, આ ચાર્જની મહત્તમ મર્યાદા પ્રતિ ટ્રાન્ઝેક્શન ₹300 રાખવામાં આવી છે. એટલે કે મોટી રકમના પેમેન્ટ પર પણ એક ટ્રાન્ઝેક્શન માટે ₹300થી વધુ MDR ચૂકવવો પડશે નહીં. ગ્રાહક પાસેથી સીધો ચાર્જ લેવામાં આવશે નહીં MDRની રકમ સીધી ગ્રાહક પાસેથી લેવાની નથી. આ પેમેન્ટ સ્વીકારનાર પક્ષ એટલે કે વેપારી અથવા સંસ્થાનો ખર્ચ છે. જોકે, સવાલ એ છે કે આ વધારાનો ખર્ચ બ્રોકર અથવા અન્ય કંપનીઓ પોતે ઉઠાવશે કે ભવિષ્યમાં તેની કોઈ અસર ગ્રાહકો પર પડશે. બ્રોકરો સામે છે આ સમસ્યા ધારો કે કોઈ ગ્રાહકે UPI દ્વારા પોતાના બ્રોકરના ખાતામાં પૈસા જમા કરાવ્યા, પરંતુ બાદમાં તે પૈસાથી કોઈ શેર ખરીદ્યો નહીં. આવી સ્થિતિમાં પણ બ્રોકરે MDR ચૂકવવો પડી શકે છે. આ કારણે સવાલ ઊભો થઈ રહ્યો છે કે આવા કિસ્સામાં વધારાનો ખર્ચ કોણ ઉઠાવશે. NSEના CEO આશિષ કુમાર ચૌહાણના જણાવ્યા અનુસાર, તેનો ઉકેલ બ્રોકર અને ગ્રાહકે સાથે મળીને શોધવો પડશે. તેમણે કહ્યું કે હવે એ જોવાનું રહેશે કે નવા ચાર્જને લઈને બ્રોકર અને ગ્રાહકો કેવી પ્રતિક્રિયા આપે છે.