મેઘાલયમાં UDPના 8 ધારાસભ્યો ભાજપમાં જોડાયા:ભાજપના ધારાસભ્યો 2થી વધીને 10 થયા, રાજ્યમાં બીજી સૌથી મોટી પાર્ટી બની

મેઘાલયની યુનાઇટેડ ડેમોક્રેટિક પાર્ટી (UDP)ના 8 ધારાસભ્યો બુધવારે નવી દિલ્હીમાં ભાજપમાં જોડાઈ ગયા. પાર્ટીના મુખ્યાલયમાં કેન્દ્રીય મંત્રી કિરણ રિજિજુ સહિત પાર્ટીના અન્ય નેતાઓની હાજરીમાં તેમણે પાર્ટીનું સભ્યપદ સ્વીકાર્યું. રાજ્યમાં અગાઉ ભાજપના 2 ધારાસભ્યો હતા. UDPના 8 ધારાસભ્યો ભાજપમાં જોડાયા બાદ પાર્ટીના ધારાસભ્યોની સંખ્યા વધીને 10 થઈ ગઈ છે. આ સાથે જ ભાજપ વિધાનસભામાં નેશનલ પીપલ્સ પાર્ટી (NPP) પછી બીજી સૌથી મોટી પાર્ટી બની ગઈ છે. રાજ્યમાં મેઘાલય ડેમોક્રેટિક અલાયન્સ (MDA)ની સરકાર છે. તેમાં NPP, UDP અને ભાજપ ત્રણેય પાર્ટીઓ સામેલ છે. બીજી તરફ, UDPના ધારાસભ્યોની સંખ્યા 12થી ઘટીને 4 રહી ગઈ છે. રિજિજુ બોલ્યા- તમામ NDA સરકારના કામકાજથી પ્રભાવિત હતા ભાજપમાં સામેલ થનારા ધારાસભ્યોમાં લહકમન રિંબુઈ, પિયસ મારવીન, કિર્મેન શૈલા, માયરેલબાર્ન સિયેમ, મેથ્યુ કુર્બાહ, ઓલાન સિંહ સુઈન, બાલાજીએડ કુફર સિનરેમ અને સિનશર કુફર રોયનો સમાવેશ થાય છે. કિરેને રિજિજુએ પ્રેસ કોન્ફરન્સમાં કહ્યું કે વડાપ્રધાન નરેન્દ્ર મોદીના નેતૃત્વમાં ઉત્તર-પૂર્વ અને મેઘાલયમાં થઈ રહેલી પ્રગતિને જોતા તેમણે પાર્ટીમાં સામેલ થવાનો નિર્ણય લીધો છે. UDPના પૂર્વ ધારાસભ્ય જેમિનોએ 12 સપ્ટેમ્બરે ભાજપમાં જોડાયા હતા UDPના પૂર્વ ધારાસભ્ય જેમિનો માવથોહ 12 સપ્ટેમ્બરે ભાજપમાં જોડાઈ ગયા હતા. ત્યારથી એવી અટકળો લગાવવામાં આવી રહી હતી કે વધુ 8 ધારાસભ્યો ભાજપમાં જોડાઈ શકે છે. UDPના અધ્યક્ષ મેહતબા લિંગદોહે કહ્યું હતું કે પાર્ટીના ધારાસભ્યો એકતાબદ્ધ છે. 11 સપ્ટેમ્બરે શિલોંગમાં UDPની સેન્ટ્રલ એક્ઝિક્યુટિવ કમિટીની બેઠક યોજાઈ હતી. તેમાં પાર્ટીના 6 ધારાસભ્યો હાજર રહ્યા ન હતા.