પરિણીતાના ફોટો સાથે ફેક ઇન્સ્ટાગ્રામ આઈડી બનાવી બદનામ કરાઈ:મોબાઈલ નંબર સાથે અશ્લીલ લખાણ લખી વીડિયો વાયરલ કર્યો

અમદાવાદના નારોલ વિસ્તારમાં સોશિયલ મીડિયાના દુરુપયોગ થકી એક પરિણીતાનું ચારિત્ર્ય હનન કરવાનો શરમજનક કિસ્સો પ્રકાશમાં આવ્યો છે. નારોલ ખાતે રહેતી 29 વર્ષીય પરિણીતાના સોશિયલ મીડિયા એકાઉન્ટ પરથી અંગત તસવીરો ચોરી કરી કોઈ અજાણ્યા શખ્સે બનાવટી ઇન્સ્ટાગ્રામ આઈ.ડી. બનાવી હતી. ત્યારબાદ પરિણીતાના ફોટા પર તેનો મોબાઈલ નંબર અને અશ્લીલ લખાણ ઉમેરી વીડિયો બનાવી સોશિયલ મીડિયામાં વાયરલ કરી બદનામ કરવાનો પ્રયાસ કર્યો હતો. આ અંગે પીડિતાએ નારોલ પોલીસ સ્ટેશનમાં અજાણ્યા વિકૃત તત્વ સામે ફરિયાદ નોંધાવી છે. UP રહેતી નાની બહેને વાયરલ વીડિયો જોયો મૂળ ઉત્તરપ્રદેશના ફિરોજાબાદના વતની અને છેલ્લા આઠ વર્ષથી પરિવાર સાથે નારોલમાં સ્થાયી થયેલી 29 વર્ષીય પરિણીતા ઇન્સ્ટાગ્રામ પર પોતાનું અંગત એકાઉન્ટ ધરાવે છે. ગત 9 સપ્ટેમ્બરના રોજ સવારે ઉત્તરપ્રદેશ ખાતે રહેતી તેમની નાની બહેને અચાનક ફોન કરીને આ બનાવટી એકાઉન્ટ અને વાયરલ વીડિયો અંગે જાણ કરી હતી. બહેને જણાવ્યું હતું કે એક અજાણી ઇન્સ્ટાગ્રામ આઈડી પરથી પરિણીતાના ફોટા સાથે અત્યંત વાંધાજનક વીડિયો પોસ્ટ કરવામાં આવ્યો છે. અંગત પ્રોફાઇલમાંથી ફોટો ચોરી કરી નંબર સાથે અશ્લીલ સ્ટોરી પોસ્ટ કરી બહેનની વાત સાંભળી પરિણીતાએ ઇન્સ્ટાગ્રામ ચેક કરતાં પગ નીચેથી જમીન સરકી ગઈ હતી. કોઈ અજાણ્યા શખ્સે પરિણીતાના અસલ એકાઉન્ટમાંથી તેના અંગત ફોટા મેળવી લીધા હતા અને ત્યારબાદ તે ફોટા પર પરિણીતાનો મોબાઈલ નંબર તથા બિભત્સ-અભદ્ર શબ્દો લખી તેને બદનામ કરવાના બદઇરાદે સ્ટોરી બનાવી વીડિયો વાયરલ કરી દીધો હતો. નારોલ પોલીસે ગુનો નોંધી તપાસ હાથ ધરી સામાજિક બદનામી અને માનસિક ત્રાસનો ભોગ બનેલી પરિણીતાએ પરિવારની મદદથી તુરંત પોલીસનો સંપર્ક સાધ્યો હતો. આ સમગ્ર મામલે નારોલ પોલીસે અજાણ્યા ઇસમ વિરુદ્ધ આઈટી એક્ટ તેમજ છેડતી-બદનામીની સંબંધિત કલમો હેઠળ ગુનો દાખલ કર્યો છે. પોલીસે સાયબર ક્રાઈમ સેલની મદદ મેળવી આઈપી એડ્રેસ અને એકાઉન્ટ ડિટેલ્સના આધારે વિકૃત માનસિકતા ધરાવતા આરોપીને ઝડપી પાડવા ચક્રો ગતિમાન કર્યા છે.