પોરબંદરમાં પાણી પુરવઠા માટે 1,320 મીટરની નવી લાઇનનું આયોજન:NC-38માં વધારાની લાઇનથી 20 MLD નર્મદા પાણી મળશે; બંધ ડંકી-હેન્ડપંપ શરૂ કરવા મેયરની સૂચના

પોરબંદર શહેરમાં પીવાના પાણીની જરૂરિયાતને ધ્યાનમાં રાખીને મહાનગરપાલિકા પાણી પુરવઠાની વ્યવસ્થાને મજબૂત બનાવવા આયોજન કરી રહી છે. મેયર સાગરભાઈ મોદીએ જણાવ્યું કે, NC-38 પાણી પુરવઠા લાઇનમાં આશરે 1,320 મીટરની એક્સ્ટેન્શન લાઇન નાખવાની કામગીરી શરૂ કરાશે. મેયરના કહેવા મુજબ, હાલ પોરબંદર શહેરને નર્મદા આધારિત વ્યવસ્થાથી લગભગ 15 MLD પાણી મળે છે. નવી 1,320 મીટરની એક્સ્ટેન્શન લાઇન શરૂ થયા પછી વધારાનું 20 MLD પાણી મળી શકશે. તેનાથી શહેરના પાણી વિતરણને વધુ મજબૂતી મળશે. પોરબંદર શહેરને પૂરતું અને નિયમિત પાણી મળે તે માટે રાજ્ય સરકારને રજૂઆતો કરવામાં આવી છે. મહાનગરપાલિકાના જણાવ્યા મુજબ, લાઇનનું કામ જલ્દી શરૂ થાય તે માટે આયોજન ચાલી રહ્યું છે. મેયર સાગરભાઈ મોદીએ પાણી પુરવઠાના પ્રશ્ન પર ધ્યાન આપવા બદલ કેન્દ્રીય મંત્રી મનસુખભાઈ માંડવિયા, કેબિનેટ મંત્રી અર્જુનભાઈ મોઢવાડિયા અને પાણી પુરવઠા વિભાગનો આભાર માન્યો હતો. અગાઉ પણ મહાનગરપાલિકાએ શહેરને નિયમિત પાણી મળે તે માટે સંબંધિત વિભાગોને રજૂઆત કરી હતી. મેયર સાગરભાઈ મોદીએ મહાનગરપાલિકાના વોટર વર્ક્સ વિભાગને શહેરમાં બંધ પડેલી ડંકીઓ અને હેન્ડપંપને તરત જ ચાલુ કરવાની સૂચના આપી છે. નાગરિકોને રોજિંદા ઉપયોગ માટે પાણી મેળવવામાં મુશ્કેલી ન પડે તે માટે જગ્યા પ્રમાણે કામગીરી કરવા કહેવાયું છે. મહાનગરપાલિકાએ ભવિષ્યમાં શહેરની વધતી પાણીની જરૂરિયાતને ધ્યાનમાં રાખીને પાણીના સ્ત્રોતથી લઈને વિતરણ વ્યવસ્થા સુધીનું આયોજન વધુ મજબૂત બનાવવાની વાત કરી છે.