પીપળીમાં શિક્ષણમંત્રીએ 96 લાખના રોડનું લોકાર્પણ કર્યું:7 લાખના કિચન શેડનું ખાતમુહૂર્ત, પોષણ ચેમ્પિયન બાળકો અને આશાવર્કર સન્માનિત

કોડિનાર તાલુકાના પીપળી ગામે શિક્ષણમંત્રી ડૉ. પ્રદ્યુમનભાઈ વાજાના હસ્તે વિવિધ વિકાસકાર્યોનું લોકાર્પણ અને ખાતમુહૂર્ત કરાયું. 96 લાખના ખર્ચે બનેલા સી.સી. રોડનું લોકાર્પણ થયું. 7 લાખના ખર્ચે બનનારા મધ્યાહ્ન ભોજન કિચન શેડનું ખાતમુહૂર્ત કરાયું. મંત્રી વાજાએ જણાવ્યું કે, 96 લાખના રોડનું લોકાર્પણ ગ્રામ્ય વિસ્તારમાં સુવિધાઓના નવા યુગની શરૂઆત છે. ગામડાઓમાં પાયાની સુવિધાઓ મજબૂત બનવાથી ગ્રામજનોના રોજિંદા જીવનમાં સરળતા આવે છે. 7 લાખના કિચન શેડથી શાળાના વિદ્યાર્થીઓને ભોજન વ્યવસ્થામાં સુવિધા મળશે. આ પ્રસંગે ‘આંગણ ઉત્સવ’ અંતર્ગત 90 દિવસ આંગણવાડીમાં હાજર રહેનાર બાળકોને ‘પોષણ ચેમ્પિયન એવોર્ડ’ અપાયા. ઉત્કૃષ્ટ કામગીરી કરનાર આશાવર્કર બહેનોને પણ સન્માનિત કરાઈ. પૂર્વ સાંસદ દિનુભાઈ સોલંકી સહિત અનેક આગેવાનો અને ગ્રામજનો હાજર રહ્યા.