પી.પી.જી. હાઈસ્કૂલમાં 'વિકસિત ભારત 2047' પર વક્તૃત્વ સ્પર્ધા યોજાઈ:દેશને આત્મનિર્ભર અને વિકસિત બનાવવાની સંકલ્પના સાકાર કરવા આયોજન કરાયું

પી.પી.જી. એક્સપેરિમેન્ટલ હાઈસ્કૂલમાં 'વિકસિત ભારત ૨૦૪૭' વિષય પર વક્તૃત્વ સ્પર્ધા યોજાઈ હતી. આ સ્પર્ધાનો મુખ્ય હેતુ યુવા પેઢીને દેશના વિકાસ પ્રત્યે જાગૃત કરવાનો અને તેમના નવા વિચારોને એક મંચ આપવાનો હતો. દેશને વર્ષ ૨૦૪૭ સુધીમાં આત્મનિર્ભર અને વિકસિત બનાવવાની સંકલ્પના સાકાર કરવાના ભાગરૂપે આ આયોજન કરાયું હતું. આ સ્પર્ધામાં ૩૦ વિદ્યાર્થીઓએ ઉત્સાહભેર ભાગ લીધો હતો. વિદ્યાર્થીઓએ શાળા પ્રવેશોત્સવ, વસુધૈવ કુટુમ્બકમ, ખેલમહાકુંભ, ડિજિટલ ઈન્ડિયા અને કૃષિ મહોત્સવ જેવા વિષયો પર પોતાના વિચારો રજૂ કર્યા હતા. માધ્યમિક કક્ષાએ પ્રિશા જનસારી પ્રથમ, ફેની મોદી દ્વિતીય અને ભરત દેસાઈ તૃતીય ક્રમે રહ્યા હતા. ઉચ્ચતર માધ્યમિક કક્ષાએ બંસરી પરમાર પ્રથમ, ભૂમિકા દેસાઈ દ્વિતીય અને આરતી પરમાર તૃતીય ક્રમે રહ્યાં હતાં. ડૉ. દાનેશ મોદી, ઉપેન્દ્ર ગજ્જર અને મહેશભાઈ ઠાકોરે નિર્ણાયક તરીકે સેવા આપી હતી. સ્પર્ધાના અંતે, કેમ્પસ સંચાલક ડૉ. જય ધ્રુવ, શાળાના આચાર્ય ડૉ. ઝુઝારસંગ સોઢા, શાળા કોઓર્ડિનેટર યોગેશભાઈ પટેલ, શાળા સુપરવાઇઝર હર્ષદભાઈ ડામોર અને ગમનભાઈ સુથાર સહિત શાળા પરિવારે ભાગ લેનાર વિદ્યાર્થીઓને અભિનંદન પાઠવ્યા હતા. તેમણે વિદ્યાર્થીઓના ઉજ્જવળ ભવિષ્ય માટે શુભેચ્છાઓ પણ આપી હતી.