પારડીમાં રેગઝીન બનાવતી કંપનીમાં આગ:ધુમાડાના ગોટા દૂર સુધી દેખાયા, વલસાડ અને અતુલ ફાયર બ્રિગેડે કલાકમાં કાબૂ મેળવ્યો

વલસાડ જિલ્લાના પારડીમાં ફાયર સ્ટેશનની પાછળ આવેલી રેગઝીન બનાવતી કંપનીમાં આગ લાગી હતી. આગ એટલી મોટી હતી કે આખી કંપનીમાંથી ધુમાડાના કાળા ગોટા આકાશમાં ઊંચે સુધી દેખાયા હતા. શનિ-રવિની રજા હોવાથી કંપની બંધ હતી. આ કારણે કોઈ મોટી જાનહાનિ થઈ ન હતી. પારડી નગરપાલિકાના ફાયર ઓફિસર દિવ્યેશ પટેલે જણાવ્યું કે, આગની જાણ થતાં જ તેમની ટીમે તરત કામ શરૂ કરી દીધું હતું. કંપનીમાં રેગઝીન અને કેમિકલ જેવો સળગી ઊઠે તેવો સામાન હતો. આ કારણે આગ ખૂબ ફેલાઈ ગઈ હતી અને નાના બ્લાસ્ટ પણ થયા હતા. આગની ગંભીરતા જોઈને વલસાડ નગરપાલિકા અને અતુલ લિમિટેડની ફાયર ટીમોને પણ મદદ માટે બોલાવાઈ હતી. લગભગ દોઢ કલાકની મહેનત પછી ત્રણ ફાયર ફાઈટરોની ટીમે આગ પર પૂરો કાબૂ મેળવી લીધો હતો. ત્યારબાદ કૂલિંગનું કામ શરૂ કરાયું હતું. કંપની રહેણાંક વિસ્તાર અને બીજી નાની કંપનીઓની નજીક હોવાથી પોલીસે ભીડને દૂર કરી સુરક્ષા આપી હતી. પહેલા અનુમાન મુજબ, આગ શોર્ટ સર્કિટને કારણે લાગી હોવાનું મનાય છે. આ કારણે કંપની માલિકને લાખો રૂપિયાનું નુકસાન થયું છે. આગ લાગવાનું ચોક્કસ કારણ જાણવા માટે FSL ટીમની મદદ લેવાશે.