નરોડા કોલેજ NSS વિભાગે CPR તાલીમ કાર્યક્રમ યોજ્યો:બિલિયન હાર્ટ બીટીંગ અને એપોલો ફાઉન્ડેશનના સહયોગથી વિદ્યાર્થીઓને અપાઈ તાલીમ

શ્રીમતી એ.પી. પટેલ આર્ટ્સ એન્ડ સ્વ. શ્રી એન.પી. પટેલ કોમર્સ કોલેજ, નરોડાના NSS વિભાગ દ્વારા 16 સપ્ટેમ્બર 2026ના રોજ બિલિયન હાર્ટ બીટીંગ ફાઉન્ડેશન અને એપોલો ફાઉન્ડેશનના સહયોગથી વિદ્યાર્થીઓ માટે CPR (Cardiopulmonary Resuscitation) તાલીમ કાર્યક્રમનું આયોજન કરવામાં આવ્યું હતું. આ તાલીમ કાર્યક્રમનો મુખ્ય હેતુ વિદ્યાર્થીઓમાં કટોકટીની પરિસ્થિતિમાં તાત્કાલિક પ્રાથમિક સારવાર અને CPR અંગે જાગૃતિ લાવવાનો હતો. કાર્યક્રમ દરમિયાન નિષ્ણાતોએ હૃદયની કટોકટી જેવી પરિસ્થિતિમાં જીવ બચાવવા માટે CPR કેવી રીતે આપવું તે સમજાવ્યું. કઈ પરિસ્થિતિમાં CPRની જરૂર પડે છે અને કટોકટીના સમયે યોગ્ય પગલાં કેવી રીતે લેવા તે અંગે પણ વિદ્યાર્થીઓને માર્ગદર્શન અપાયું. નિષ્ણાતોએ CPRની પ્રાથમિક પ્રક્રિયાનું પ્રાયોગિક નિદર્શન પણ કર્યું. આનાથી વિદ્યાર્થીઓને CPRની યોગ્ય પદ્ધતિ સમજવામાં મદદ મળી. વિદ્યાર્થીઓએ તાલીમમાં ઉત્સાહપૂર્વક ભાગ લીધો અને જીવન બચાવવાની આ મહત્વપૂર્ણ કૌશલ્ય વિશે વ્યવહારુ જ્ઞાન મેળવ્યું. આ પ્રસંગે કોલેજના પ્રિન્સિપાલ ડો. મુકેશભાઈ પ્રજાપતિ, અધ્યાપકો અને NSSના સ્વયંસેવકો મોટી સંખ્યામાં હાજર રહ્યા હતા. સમગ્ર કાર્યક્રમનું આયોજન અને સંચાલન પ્રોગ્રામ ઓફિસર ડો. ગોવિંદભાઈ ચૌધરી અને ભાવનાબેન પ્રજાપતિએ કર્યું હતું. આવા તાલીમ કાર્યક્રમોથી વિદ્યાર્થીઓમાં મુશ્કેલીના સમયે તાત્કાલિક મદદ કરવાની ક્ષમતા, માનવજીવન પ્રત્યેની જવાબદારી અને સામાજિક સેવાભાવના વધે છે.