પાટણમાં સરકારી કચેરીઓ-સ્કૂલના રસ્તા ખાડા અને પાણીથી બેહાલ:ખોદકામ પછી કામ અધૂરું રહેતા નાગરિકો-વિદ્યાર્થીઓ પરેશાન, અકસ્માતનો ભય

પાટણ શહેરમાં પ્રાંત કચેરી, નોર્થ ગુજરાત એજ્યુકેશન સોસાયટી, સ્કૂલ-કોલેજ અને સિટી સર્વે કચેરી તરફ જતા મુખ્ય રસ્તાઓની હાલત ખરાબ થઈ ગઈ છે. સતત વરસાદને કારણે આ રસ્તાઓ પર ખાડા પડી ગયા છે. અગાઉ ખોદકામ કરાયા પછી રોડનું કામ બરાબર પૂરું ન થતા ખાડાઓમાં પાણી ભરાઈ ગયું છે. સરકારી કચેરીઓમાં કામ માટે આવતા નાગરિકો અને સ્કૂલ-કોલેજના વિદ્યાર્થીઓને આ ખાડા અને પાણીમાંથી પસાર થવું પડે છે. રસ્તા પર પાણી ભરાયેલું હોવાથી ખાડા કેટલા ઊંડા છે તેનો અંદાજ આવતો નથી. આ કારણે રાહદારીઓ અને વાહનચાલકો માટે અકસ્માતનો ભય છે. પાટણ પ્રાંત અધિકારીની કચેરીથી તેમના સરકારી ઘર તરફ જતા રસ્તાની હાલત પણ ખરાબ છે. એક તરફ જિલ્લા વહીવટી તંત્ર શહેરમાં વિકાસ અને સારા રસ્તાના દાવા કરે છે. બીજી તરફ સરકારી કચેરીઓ અને શૈક્ષણિક સંસ્થાઓ પાસે જ રસ્તાની આવી ખરાબ હાલત જોઈને તંત્રની કામગીરી સામે સવાલો ઉભા થયા છે. સ્થાનિક લોકોનું કહેવું છે કે રસ્તાનું ખોદકામ થયાને ઘણો સમય થઈ ગયો છે. તેમ છતાં ખાડા પૂરવાનું અને નવો રોડ બનાવવાનું કામ કેમ નથી થયું? આ કામ માટે કયો વિભાગ જવાબદાર છે અને કામ પૂરું કરવામાં મોડું કેમ થઈ રહ્યું છે, તે અંગે પણ નાગરિકોમાં ચર્ચા ચાલી રહી છે. વરસાદી પાણી અને કાદવથી ભરાયેલા આ રસ્તા પરથી દરરોજ સરકારી કર્મચારીઓ, નાગરિકો અને વિદ્યાર્થીઓ પસાર થાય છે. કોઈ વ્યક્તિ ખાડામાં પડીને ઘાયલ થાય અથવા વાહન અકસ્માત થાય તે પહેલાં તંત્ર તાત્કાલિક તપાસ કરે. ખાડા પૂરી દેવાય, પાણીનો નિકાલ કરાય અને રસ્તાનું કાયમી સમારકામ કરાય તેવી માંગ છે. સરકારના વિકાસના દાવાઓ વચ્ચે પાટણના સરકારી કચેરી વિસ્તારની આ હાલત પર તંત્ર ધ્યાન આપે. જવાબદાર વિભાગને તાત્કાલિક કાર્યવાહી કરવા સૂચના અપાય તેવી સ્થાનિક લોકોની માંગ છે.