પાટણ માર્ગ અને મકાન વિભાગે કાર્યક્ષમતા વધારવા ચિંતન શિબિર કરી:‘માનવ મૂડી અને સંસ્થાકીય શ્રેષ્ઠતા’ વિષય પર અધિકારીઓ-કર્મચારીઓ વચ્ચે ગહન મંથન

પાટણના માર્ગ અને મકાન વિભાગે સર્કિટ હાઉસમાં ‘માનવ મૂડી અને સંસ્થાકીય શ્રેષ્ઠતા’ વિષય પર ચિંતન શિબિર કરી. કાર્યપાલક ઇજનેર આર.બી. પંચાલ તેના અધ્યક્ષ હતા. આ શિબિરનો હેતુ વિભાગની કામગીરીને વધુ સારી, ગુણવત્તાવાળી અને કાર્યક્ષમ બનાવવાનો હતો. શિબિરમાં રસ્તા, પુલ અને મકાનના બાંધકામ, સુપરવિઝન, ડિઝાઇન, જાળવણી અને સમારકામની કામગીરી પર વાત થઈ. વર્ક આસીસ્ટન્ટ, મદદનીશ ઇજનેર, અધિક મદદનીશ ઇજનેર અને નાયબ કાર્યપાલક ઇજનેરોને પડતી મુશ્કેલીઓ પર ચર્ચા કરીને તેના ઉકેલો શોધવામાં આવ્યા. આ ઉપરાંત, માનવ સંસાધન વિકાસ, યોગ્યતા વધારવી, તાલીમ, ક્ષમતા નિર્માણ, જાહેર સંચાર વ્યૂહરચના, નાગરિક સંપર્ક, નીતિ વ્યવસ્થાપન, વિભાગો વચ્ચે સંકલન, નીતિનું રક્ષણ, નાણાકીય આયોજન, બજેટનો સારો ઉપયોગ અને ખર્ચ કાર્યક્ષમતા જેવા મહત્વના વિષયો પર પણ વિગતવાર ચર્ચા થઈ. પ્રાથમિક અને ખાતાકીય તપાસ સહિતના વહીવટી અને ટેકનિકલ મુદ્દાઓ પર પણ વાત થઈ. વિભાગની કામગીરીમાં પારદર્શિતા, જવાબદારી અને કાર્યક્ષમતા વધારવા માટે સૂચનો લેવાયા. આ શિબિર દ્વારા અધિકારીઓ અને કર્મચારીઓએ પોતાના અનુભવો અને મુશ્કેલીઓ એકબીજા સાથે શેર કર્યા. આનાથી કામગીરીમાં ગુણવત્તા, સમયનું પાલન, સંકલન અને સંસ્થાકીય કાર્યક્ષમતા વધુ સારી બનાવવાનો પ્રયાસ કરાયો.