મોરબીમાં બે સ્થળે ગેરકાયદે ખનન અને વહન ઝડપાયું:ખાણ-ખનિજ વિભાગે 1.40 કરોડનો મુદ્દામાલ સીઝ કર્યો

મોરબી જિલ્લામાં બે સ્થળે ખાણ-ખનિજ વિભાગની ટીમે ચેકિંગ કર્યું હતું. ટીમને ગેરકાયદે ખનન અને ખનિજનું વહન થતું જણાયું હતું. બંને સ્થળેથી કુલ 1.40 કરોડનો મુદ્દામાલ સીઝ કરાયો છે. ભૂસ્તરશાસ્ત્રી જગદીશ એસ. વાઢેર અને તેમની ટીમે વાંકાનેર તાલુકાના જામસર ગામની સીમમાં રેડ કરી હતી. ત્યાં સેન્ડસ્ટોનનું ગેરકાયદે ખનન અને વહન થતું હતું. ટીમે પીળા રંગનું કોમાત્સુ કંપનીનું એક્સકેવેટર અને જીજે 13 એટી 1280 નંબરનું ડમ્પર સીઝ કર્યું હતું. બંને વાહનોના માલિક વિજયભાઈ અશોકભાઈ ચારલા છે. તેઓ વાંકાનેર તાલુકાના ઢુવા ગામના રહેવાસી છે. આ સ્થળેથી આશરે 1 કરોડનો મુદ્દામાલ કબજે કરાયો હતો. મોરબીના લખધીરપુર રોડ પર પણ ટીમે ચેકિંગ કર્યું હતું. ત્યાં જીજે 12 બીઝેડ 2300 નંબરના ડમ્પરમાં ચાઈના ક્લે ખનિજ ભરીને ગેરકાયદે વહન થતું હતું. ડમ્પરના માલિક જગદીશભાઈ સામતભાઈ સોલંકી છે, જે મોરબીના વિકાસ પાર્કમાં રહે છે. ટીમે 40 લાખનો મુદ્દામાલ સીઝ કરીને ડમ્પર કેવલ સ્ટોન, લખધીરપુર ખાતે કસ્ટડીમાં મૂક્યું હતું. વિભાગે ગેરકાયદે ખનન થયેલા વિસ્તારની માપણી કરીને દંડ વસૂલવા અને આરોપીઓ સામે ફોજદારી કાર્યવાહી કરવા આગળની કામગીરી હાથ ધરી છે.