લોડાઈમાં 1.75 કરોડના વિકાસકાર્યોનું લોકાર્પણ:વિદ્યાર્થીઓને મળી આધુનિક શાળાની ભેટ, મંત્રી ત્રિકમભાઈ છાંગા રહ્યા હાજર

કચ્છના લોડાઈ ગામમાં શિક્ષણ માટે નવી સુવિધાઓ શરૂ થઈ છે. અહીં પ્રાથમિક શાળાના નવા મકાન સહિત 1.75 કરોડ રૂપિયાના વિકાસકામોનું લોકાર્પણ કરવામાં આવ્યું. ઉચ્ચ અને ટેક્નિકલ શિક્ષણ રાજ્યમંત્રી ત્રિકમભાઈ છાંગાની હાજરીમાં આ કાર્યક્રમ યોજાયો હતો. આ કામોમાં પ્રાથમિક શાળાનું નવું મકાન, મધ્યાહન ભોજનનું રસોડું, શેડ અને કમ્પાઉન્ડ વોલ જેવી સુવિધાઓનો સમાવેશ થાય છે. આ પ્રસંગે રાજ્યમંત્રી ત્રિકમભાઈ છાંગાએ કહ્યું કે, શાળા ફક્ત ભણતરની જગ્યા નથી, પણ બાળકોના ઘડતર અને સંસ્કારનું કેન્દ્ર પણ છે. તેમણે જણાવ્યું કે લોડાઈની આ શાળા બધા સમાજના બાળકો માટે શિક્ષણનું અગત્યનું કેન્દ્ર બનશે. મંત્રીએ બાળકો દ્વારા તેમના માતા-પિતાને કાર્યક્રમમાં બોલાવવાની પહેલને પણ વખાણી. તેમણે કહ્યું કે માતા-પિતાનું સ્થાન જીવનમાં સૌથી ઊંચું છે અને વડીલો પ્રત્યે આદર, લાગણી અને જવાબદારી રાખવી એ શિક્ષણનો મુખ્ય ભાગ છે. રાજ્યમંત્રીએ લોડાઈ અને આસપાસના વિસ્તારના વિકાસ વિશે પણ વાત કરી. તેમણે કહ્યું કે, અલગ-અલગ ક્ષેત્રોમાં પાયાની સુવિધાઓને મજબૂત કરવાના પ્રયાસો ચાલી રહ્યા છે. આરોગ્ય સેવાઓ, ઉચ્ચ શિક્ષણ માટે એક્સટેન્શન સેન્ટર, વીજળી માટે સબસ્ટેશન, રસ્તા, કેનાલ અને પીવાના પાણી જેવી સુવિધાઓથી વિસ્તારના વિકાસને વેગ મળ્યો છે. સિંચાઈ માટે કેનાલ દ્વારા પાણી આપવાનું કામ પણ આગળ વધી રહ્યું છે. મંત્રીએ લોડાઈ વિસ્તારના ભવિષ્ય વિશે આશા વ્યક્ત કરી. તેમણે કહ્યું કે, આવનારા વર્ષોમાં અહીં શહેર જેવી સુવિધાઓ બનવાની શક્યતા છે. તેમણે ખેતીને આર્થિક સમૃદ્ધિનું મુખ્ય સાધન ગણાવી ગ્રામજનોને પોતાની જમીનનું મહત્વ જાળવી રાખવા પણ અપીલ કરી. આ કાર્યક્રમમાં જિલ્લા અને તાલુકા પંચાયતના પદાધિકારીઓ, ચૂંટાયેલા પ્રતિનિધિઓ, સરપંચો, અધિકારીઓ, શિક્ષકો, વિદ્યાર્થીઓ, આગેવાનો અને મોટી સંખ્યામાં ગ્રામજનો હાજર રહ્યા હતા. નવા શાળા મકાન અને બીજી સુવિધાઓ મળવાથી લોડાઈના વિદ્યાર્થીઓને ભણવા માટે સારું વાતાવરણ મળ્યું છે.