કોલકમાં સેવાસેતુ: ગામમાં જ થયા સરકારી કામ:14 કિમી દૂર કચેરી જવાની ઝંઝટ ટળી, પાંચ મિનિટમાં ચૂંટણીકાર્ડનું સરનામું બદલાયું

વલસાડ જિલ્લાના પારડી તાલુકાના કોલક ગામમાં રાજ્ય સરકારના 'સરકાર તમારા દ્વારે' અભિગમ હેઠળ સેવાસેતુ કાર્યક્રમ 2.1 યોજાયો હતો. આ કાર્યક્રમમાં ગ્રામજનોને ચૂંટણીકાર્ડ, રેશનકાર્ડ, આયુષ્માન કાર્ડ, આધારકાર્ડ, સોલાર કનેક્શન અને સાઈબર ક્રાઈમ સહિતની વિવિધ સરકારી સેવાઓનો લાભ સ્થળ પર જ મળ્યો હતો. આનાથી લોકોને તાલુકા મથક સુધી જવાની ઝંઝટ ટળી અને તેમના સમય તથા પૈસાની બચત થઈ. પારડી તાલુકાના ઉદવાડાના આકાશ દિનેશભાઈ પટેલને તેમના ચૂંટણીકાર્ડમાં દમણના સરનામાને બદલીને ઉદવાડાનું સરનામું કરાવવું હતું. આ કામ માટે તેમને લગભગ 14 કિલોમીટર દૂર તાલુકા કચેરીએ જવું પડત. જોકે, કોલકમાં સેવાસેતુ યોજાતા તેમનું કામ માત્ર પાંચ મિનિટમાં પૂરું થઈ ગયું. તેમણે ઘરઆંગણે સેવા મળવા બદલ સરકારનો આભાર માન્યો. પ્રિયંકા જતીન રાજપૂતના લગ્ન પછી તેમનું નામ ઉદવાડાના પિયર પક્ષના રેશનકાર્ડમાંથી કાઢીને કોલકના સાસરી પક્ષના રેશનકાર્ડમાં ઉમેરવાનું હતું. તાલુકા કચેરી સુધી જવા માટે સમય ન મળતો હોવાથી આ કામ લાંબા સમયથી બાકી હતું. સેવાસેતુ વિશે જાણ થતાં તેઓ જરૂરી કાગળો સાથે પહોંચ્યા અને તેમનું કામ ત્યાં જ પૂરું થઈ ગયું. કોલકના 70 વર્ષથી વધુ ઉંમરના વરિષ્ઠ નાગરિક નટવરલાલ પટેલ પાસે આયુષ્માન ભારત યોજના હેઠળનું વય વંદના કાર્ડ નહોતું. વૃદ્ધાવસ્થાને કારણે તેમને પારડી સુધી જવું મુશ્કેલ હતું. તેમણે સેવાસેતુનો લાભ લીધો અને ગામમાં જ તેમને આયુષ્માન કાર્ડ મળી ગયું. તેમણે જણાવ્યું કે આનાથી 'સરકાર તમારા દ્વારે' અભિગમ ખરેખર સાર્થક થયો છે. કોલકની વિદ્યાર્થિની વૃતિ ધર્મેશ પટેલને પોતાનું આધારકાર્ડ અપડેટ કરાવવું હતું. ભણતરને કારણે તેમને પારડી કચેરીએ જવાનો સમય મળતો નહોતો. સેવાસેતુમાં આધારકાર્ડ અપડેટ કરવાની સુવિધા મળતાં તેમનું કામ માત્ર બે મિનિટમાં પૂરું થઈ ગયું. કોલકમાં યોજાયેલા આ સેવાસેતુ કાર્યક્રમમાં મોટી સંખ્યામાં લોકોએ વિવિધ સરકારી સેવાઓનો લાભ લીધો. ગામમાં જ કામગીરી થવાથી તેમને તાલુકા કે જિલ્લા કચેરી સુધી જવાની જરૂર ન પડી. લાભાર્થીઓએ સમય અને પૈસાની બચત થવા બદલ સરકારના આ સેવાસેતુ કાર્યક્રમને આવકાર્યો હતો.