હિંમતનગર નજીક કારે 7 પદયાત્રીઓને ઉલાળ્યાં, ટોળાએ કાર સળગાવી:હિટ એન્ડ રન સર્જી કારચાલક ભાગ્યો, રોષે ભરાયેલા ટોળાએ આગચંપી કરી, SP સહિતનો પોલીસકાફલો ઘટનાસ્થળે

સાબરકાંઠાના હિંમતનગર નજીક દોલગઢ પાટિયા પાસે એક કારે પદયાત્રીઓને ટક્કર મારી હતી. આ અકસ્માતમાં પાંચથી સાત લોકો અડફેટે આવ્યા હતા. પદયાત્રીઓને ટક્કર માર્યા બાદ કાર ચાલક ભાગવાનો પ્રયાસ કરી રહ્યો હતો. આ જોઈને રોષે ભરાયેલા સ્થાનિકો અને ટોળાએ કારને રોકી લીધી હતી. ગુસ્સે ભરાયેલા ટોળાએ કારને આગ ચાંપી દીધી હતી. જોતજોતામાં કાર ભડભડ સળગી ઉઠી હતી. ઘટનાની જાણ થતા જ જિલ્લા પોલીસ વડા, ડીવાયએસપી, ગ્રામ્ય, બી ડિવિઝન અને એલસીબી પોલીસ સહિતનો કાફલો ઘટનાસ્થળે પહોંચી ગયો હતો.આગને કાબૂમાં લેવા માટે ફાયર ટીમ પણ ઘટનાસ્થળે પહોંચી હતી અને આગ ઓલવવાનો પ્રયાસ શરૂ કર્યો હતો. સ્થાનિકોના જણાવ્યા અનુસાર, ફોરલેન હાઈવે પર જાહેરનામું હોવા છતાં બેફામ વાહનો દોડતા હોવાથી પદયાત્રીઓને ભારે મુશ્કેલી પડી રહી છે.