ગણેશ આગમનમાં સ્ટીલની સ્ટીક ફેરવી રીલ બનાવવી ભારે પડી:ડુંગરી પોલીસે 24 વર્ષીય યુવકને ઝડપી પાડ્યો, શોભાયાત્રામાં સીનસપાટા ભારે પડ્યા

વલસાડના ડુંગરી પોલીસ સ્ટેશન વિસ્તારમાં ગણેશ આગમન દરમિયાન સ્ટીલની સ્ટીક ફેરવીને રીલ બનાવવી એક યુવકને ભારે પડી છે. પોલીસે 24 વર્ષીય યુવક સાહિલ જયંતિભાઈ ટંડેલને ગણતરીના કલાકોમાં ઝડપી પાડ્યો છે. તેની પાસેથી સ્ટીલની સ્ટીક પણ જપ્ત કરવામાં આવી છે. કકવાડી ગામના મેથીયા ફળિયા રોડ પર ગણેશ પ્રતિમાની શોભાયાત્રા નીકળી હતી. આ દરમિયાન સાહિલ ટંડેલ અન્ય એક યુવકના ખભા પર બેસી ગયો હતો. તેણે આશરે અઢી ફૂટ લાંબી અને કાળા હાથાવાળી સ્ટીલની સ્ટીક હાથમાં લઈને હવામાં ફેરવી હતી. તલવાર જેવી દેખાતી આ સ્ટીક સાથે નાચતા અને સ્ટંટ કરતા સાહિલનો વીડિયો બનાવવામાં આવ્યો હતો, જે બાદમાં સોશિયલ મીડિયામાં વાયરલ થયો હતો. આ વીડિયો પોલીસના ધ્યાને આવતા વલસાડ જિલ્લા પોલીસ અધિક્ષક અને નાયબ પોલીસ અધિક્ષકની સૂચનાથી ડુંગરી પોલીસે તપાસ શરૂ કરી. ડુંગરી પોલીસ સ્ટેશનના પીઆઈ યુ.એચ. પટેલ અને એએસઆઈ હિરેનભાઈ પટેલ સહિતની ટીમે યુવકની ઓળખ કરી તેને ગણેશ આગમનના સ્થળેથી જ પકડી પાડ્યો. પોલીસે સાહિલ ટંડેલ વિરુદ્ધ જી.પી. એક્ટની કલમ 135(1) અને ભારતીય ન્યાય સંહિતા (BNS)ની કલમ 223 હેઠળ ગુનો નોંધી કાયદેસરની કાર્યવાહી કરી છે. પોલીસે જણાવ્યું કે, સોશિયલ મીડિયામાં પ્રસિદ્ધિ મેળવવા માટે જાહેરમાં કાયદાનો ભંગ કરનારાઓ સામે કાર્યવાહી ચાલુ રહેશે. પોલીસે લોકોને અપીલ પણ કરી છે કે રીલ કે પ્રસિદ્ધિ માટે જોખમી સ્ટંટ ન કરે અને કાયદાની મર્યાદા જાળવે.