બોટાદના 1 કરોડના તોડકાંડમાં ભાજપના પૂર્વ મહામંત્રીનું નિવેદન લેવાયું:અમરેલીના DYSP ચિરાગ દેસાઈ સમક્ષ જગદીશ ચૌહાણે પુરાવા રજૂ કર્યા

બોટાદ શહેરમાં કથિત 1 કરોડ રૂપિયાના તોડકાંડની તપાસ ઝડપી બની છે. આ મામલે બોટાદ શહેર ભાજપના પૂર્વ મહામંત્રી જગદીશ ચૌહાણે સર્કિટ હાઉસ ખાતે અમરેલીના DYSP ચિરાગ દેસાઈ સમક્ષ પોતાનું નિવેદન આપ્યું છે. DYSP ચિરાગ દેસાઈ સર્કિટ હાઉસ ખાતે આ મામલે તપાસ કરી રહ્યા હતા. ત્યારે જગદીશ ચૌહાણે કથિત તોડકાંડ અંગેની બધી હકીકત રજૂ કરી હોવાનો દાવો કરાયો છે. મળતી માહિતી પ્રમાણે, જગદીશ ચૌહાણે કેટલાક ભાજપના હોદ્દેદારો અને એક અધિકારીને આ તોડકાંડ માટે જવાબદાર ગણાવ્યા છે. તેમણે આ અંગેના પુરાવા તપાસ અધિકારી સમક્ષ રજૂ કર્યા હોવાનું સામે આવ્યું છે. હવે રજૂ કરાયેલા નિવેદન અને પુરાવાઓના આધારે પોલીસ આગળ શું કાર્યવાહી કરે છે, તેના પર સૌની નજર છે.