મોરબી મહાનગરપાલિકાએ 3,797 રખડતા પશુ પકડ્યા:ANCD શાખાએ વધુ 15 પશુ પકડ્યા, રસ્તા પરથી પશુ પકડવાની કામગીરી ચાલુ રહેશે

મોરબી મહાનગરપાલિકાએ ચાલુ અઠવાડિયે વધુ 15 રખડતા પશુઓને પકડ્યા છે. મહાનગરપાલિકા બન્યા પછી અત્યાર સુધીમાં જાહેર રસ્તાઓ પરથી કુલ 3,797 રખડતા પશુઓને પકડવામાં આવ્યા છે. પકડાયેલા રખડતા પશુઓને મોરબી જિલ્લાની આસપાસ આવેલી ગૌશાળા, નંદીઘર અને પાંજરાપોળમાં મોકલવામાં આવે છે. આ ઉપરાંત, મોરબી મહાનગરપાલિકાના નંદીઘરમાંથી 600થી વધુ પશુઓને પણ જુદી-જુદી ગૌશાળા અને પાંજરાપોળમાં મોકલાયા છે. ANCD શાખાએ અત્યાર સુધીમાં 306 પશુમાલિકોને લાઇસન્સ આપ્યા છે. 30 પશુમાલિકોના લાઇસન્સ રિન્યૂ પણ કરવામાં આવ્યા છે. આ સિવાય, 33 લોકોને ઘાસ વેચવા માટે પરમિટ અપાઈ છે અને 4 ઘાસ વેચાણ પરમિટ રિન્યૂ કરાઈ છે. 49 નાગરિકોના પાલતુ શ્વાનનું રજિસ્ટ્રેશન પણ થયું છે. 10 શ્વાનના લાઇસન્સ/પરમિટ રિન્યૂ કરવામાં આવ્યા છે. મહાનગરપાલિકાએ પશુમાલિકોને પોતાના પશુઓનું અને પાલતુ શ્વાનના માલિકોને પોતાના શ્વાનનું રજિસ્ટ્રેશન કરાવવા અપીલ કરી છે. ANCD શાખાએ અત્યાર સુધીમાં કુલ 2,920 પશુઓનું RFID અને ટેગિંગ કર્યું છે. આગામી સમયમાં પણ RFID અને ટેગિંગનું કામ ચાલુ રહેશે. આ સાથે, જાહેર રસ્તાઓ પર રખડતા અને અડચણરૂપ બનતા પશુઓને પકડવાનું કામ પણ સતત ચાલુ રહેશે.