રીણાવાડામાં જાહેરમાં જુગાર રમતા પાંચ ઝડપાયા:રૂ.21,130 રોકડ મુદ્દામાલ કબજે કરાયો

પોરબંદર: જુગારની પ્રવૃત્તિ સામે પોલીસની કાર્યવાહીના ભાગરૂપે, બગવદર પોલીસે રીણાવાડા ગામમાં દરોડો પાડ્યો હતો. જાહેરમાં રોન પોલીસ નામનો જુગાર રમતા પાંચ લોકોને પોલીસે ઝડપી પાડ્યા હતા. પોલીસે સ્થળ પરથી કુલ 21,130 રૂપિયા રોકડા કબજે કર્યા હતા. પેટ્રોલિંગ દરમિયાન એએસઆઈ એચ.ડી. સીસોદીયાને બાતમી મળી હતી. તેમને જાણવા મળ્યું કે રીણાવાડા ગામના રબારીકેડા વિસ્તારમાં કચરા પરબતભાઈ મોઢવાડીયાના મકાન પાસે સ્ટ્રીટલાઇટના અજવાળે કેટલાક લોકો પૈસા-પાનાથી જુગાર રમી રહ્યા છે. પોલીસે તાત્કાલિક સ્થળ પર પહોંચી દરોડો પાડ્યો હતો. દરોડા દરમિયાન કચરા પરબતભાઈ મોઢવાડીયા, રાજુ છગનભાઈ ઓડેદરા, પ્રતાપ પોપટભાઈ સુત્રેજા, રાહુલ કેશુભાઈ સુડાસમા અને રાજુ ભુરાભાઈ કુછડીયાને જુગાર રમતા ઝડપી પાડવામાં આવ્યા હતા. આ ઉપરાંત, સંતોકબેન જયમલભાઈ ઓડેદરા, મધુબેન કરશનભાઈ કુછડીયા અને રૂપીબેન લાખાભાઈ ઓડેદરાને ઝડપી પાડવા માટે પણ કાર્યવાહી ચાલી રહી છે. આ સમગ્ર મામલે બગવદર પોલીસે જુગારધારા કલમ-12 મુજબ ગુનો નોંધી કાયદેસરની કાર્યવાહી કરી છે.